Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 182 Hüküm no: 170 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tebriz seferinde şehit olan İbrahim’in terekesi hususundaki talebin geçersiz olduğu Mu‘ârazadan men‘. Vilâyet-i Anadolu’da medîne-i Sivas ahâlîsinden olup hâlâ mahmiye-i İstanbul’da Mahmud Paşa kurbünde Tahtalıminâre demekle ma‘rûf hânda müsâfiren sâkin Dizdâr Mehmed Ağa b. Mahmud nâm kimesne meclis-i şer‘-i şerîf-i enverde bâ‘isü’s-sifr Bedros v. Danyel nâm zimmî muvâcehesinde üzerine da‘vâ ve takrîr-i kelâm edip yine medîne-i Sivas ahâlîsinden İbrahim b. Mehmed nâm kimesne târih-i kitâbdan bir sene mukaddem Tebriz seferine gider oldukda eşyâ-i memlûkesinden bir sandık eşyâsını mezbûr Bedros ile gāib ani’l-meclis şerîki Agop v. Sergiz nâm zimmîlere bi-tarîkı’l-emâne vaz‘ ve teslîm onlar dahi ahz u kabz eylediklerinden sonra mezbûr İbrahim zikrolunan Tebriz seferinde vefât edip verâseti min-ciheti’l-usûbeti’n-nesebiye bana münhasıra olmağla terekesini bana def‘ ve teslîme mesfûr Bedros zimmîye tenbîh olunmak bi’l-verâse murâdımdır dedikde gıbbe’s-suâl mesfûr Bedros cevâbında fi’l-hakīka mezbûr İbrahim hayatında ber-vech-i muharrer bir sandık eşyâsını memhûren bi-tarîkı’l-emâne bana vaz‘ ve teslîm ben dahi vech-i muharrer üzere ahz u kabz etmişidim. Lâkin mezbûr İbrahim vefât etmekle zâhirde vâris-i ma‘rûfu olmamağın Beytü’l-mâl-i hâssa emîni olan gāib ani’l-meclis es-Seyyid Mustafa Ağa zikrolunan sandık ve eşyâsını yedimden ahz u kabz etmişidi deyü def‘ ve mazmûnu min-külli’l-vücûh takrîrine muvâfık bir kıt‘a hüccet-i şer‘iye ibrâz edicek mezbûr Mehmed Ağa mazmûn-ı hüccet-i mezkûreyi ikrâr ve i‘tirâf etmeğin mûcebince mezbûr Mehmed Ağa bî-vech mu‘ârazadan men‘ birle mâ-vaka‘a bi’t-taleb ketb olundu. Fî-gurreti Zilhicceti’ş-şerîfe sene [1]143. Şuhûdü’l-hâl: Mehmed Çelebi b. Abdullah, Kādızade İbrahim, Abdullah b. Abdullah.