Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 183 Hüküm no: 171 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydınkethudâ mahallesinden Abdürrezzak Çelebi’nin bahçeli evini sattığı Mübâya‘a. Husûs-ı âti’l-beyânın mahâllinde ketb ve tahrîri için bi’l-iltimâs savb-ı şer‘-i kavîmden irsâl olunan Mevlânâ Mustafa Efendi b. el-merhûm Yunus Efendi mahmiye-i İstanbul’da Aydın Kethudâ mahallesinde sâkin zümre-i silâhdârândan Halil Çavuş Ağa b. Mehmed’in menziline varıp zeyl-i rakīmde muharrerü’l-esâmî Müslimîn mahzarlarında akd-i meclis-i şer‘-i şerîf ettikde mahalle-i mezbûre sâkinlerinden Abdürrezzak Çelebi b. Mehmed nâm kimesne meclis-i ma‘kūd-ı mezkûrda bâ‘isü hâze’l-kitâb mezbûr Halil Çavuş Ağa mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan el-Hâc İsmail vakfı olan bostan ve bir tarafdan sâbıkā Kozbekçisi işbu el-Hâc Hasan Ağa menzili ve bir tarafdan mahalle-i mezbûre müezzinine meşrûta vakf menzil ve bir tarafdan tarîk-ı âm ile mahdûd tahtânî iki bâb oda ve iki sofa ve bir bi’r-i mâ ve bir mikdâr bahçe ve kenîfi muhtevî mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile yüz otuz beş guruşa mezbûr Halil Çavuş Ağa’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz otuz beş guruşu yedinden tamamen ahz u kabz eyledim, min-ba‘d menzil-i mahdûd-ı mezkûr mezbûr Halil Çavuş Ağa’nın mülk-i müşterâsı olup kat‘a benim alâka ve medhalim kalmadı. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ve ma‘an ba‘s olunan Abdullah b. Mustafa ve Osman b. Ahmed ile meclis-i şer‘a gelip her biri alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 4 Zilhicce sene [1]143. Şuhûdü’l-hâl: es-Seyyid Mehmed ağa b. el-Hâc Hasan, Şeyh Ahmed b. Abdünnebi, Mehmed Çelebi b. İbrahim, Kantarî Mehmed Çelebi b. Mustafa, İsmail b. Hasan.