Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 184 Hüküm no: 172 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursalı Fâtıma Hatun’un üvey oğlu Mehmed Efendi aleyhine açtığı alacak davasının sulhla sonuçlandığı Medîne-i Bursa Bâzâr-ı esb mahallesi sâkinlerinden olup mahmiye-i İstanbul’da müsâfereten sâkine ve zâtı ta‘rîf-i şer‘î ile mu‘arrefe Fâtıma bt. el-Hâc Halil nâm hatun meclis-i şer‘-i şerîf-i enverde üveği oğlu râfi‘u’l-vesîka es-Seyyid Mehmed Efendi b. Hüseyin mahzarında ikrâr-ı tâm ve takrîr-i kelâm edip mezbûr es-Seyyid Mehmed Efendi bundan akdem medîne-i Bursa[‘da] bi-gayr-ı hakkın yedimden yetmiş guruşumu ahz u kabz eyledi deyü bâ-fermân-ı âlî mezbûr es-Seyyid Mehmed Efendi’yi Âsitâne-i sa‘âdet’e ihzâr ve meblağ-ı mezkûru da‘vâ eylediğimde ol dahi kabzını ikrâr lâkin beynimizde hukūk-ı şer‘iyeye müte‘allika da‘vâmız olmağla merkūme Fâtıma Hatun benimle yetmiş beş guruş üzerine sulh ve meblağ-ı mezkûru bana teslîm ben dahi ahz u kabz eylemişidim deyü def‘le mukābele ve def‘ini isbâtdan âciz olmağla beynimizde münâza‘ât-ı kesîre vâki‘a olmuşidi. El-hâletü-hâzihi beynimize muslihûn tavassut edip da‘vâ-yı mezkûremden merkūm es-Seyyid Mehmed Efendi ile beni yirmi guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yirmi guruşu yedinden ahz u kabz edip mâ‘adâ elli beş guruşa müte‘allika da‘vâdan mezbûr es-Seyyid Mehmed Efendi’nin zimmetini ibrâ ve ıskāt eylediğimde ol dahi kabûl ve bedel-i sulh deyü bana medfû‘u olan yirmi guruşa müte‘allika da‘vâdan benim zimmetimi ibrâ ve ıskāt etmekle min-ba‘d ehadühümânın âhar ile da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Zilhicce sene [1]143. Şuhûdü’l-hâl: el-Hâc İbrahim b. el-Hâc Mustafa, Mehmed Ağazâde Veli, es-Seyyid Ahmed b. es-Seyyid el-Hâc Mustafa, es-Seyyid Abdurrahman b. es-Seyyid Süleyman, Yusuf Ağa b. Abdullah, İbrahim b. Yusuf, Mehmed Ağa b. Yusuf, İmâmzâde Ali Ağa, Abdullah Efendi b. el-Hâc Mustafa.