Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 184 Hüküm no: 173 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görice kazası köyleri reayası ile memurlar arasında cizye tahsilinde çıkan anlaşmazlığın sulhla sonuçlandığı Görice kazâsına tâbi‘ İskapol karyesi ahâlîsinden ve karye-i merkūme kocabaşıları ve işerlerinden Koca Kosta v. Yorgi ve Todor v. Yani ve Todoroş v. Verto ve Küçük Kara Kosta v. Mitro ve Dimo v. Kosta ve Mitro v. Kosta ve Yanko v. Simo ve Atanaş v. Verbo ve Yorgaki v. Mitre ve Nikola v. Yorgi ve Todogorov v. Yorgi ve Dimo v. Atanaş ve Todor v. Papa Anaştaş ve Nikola v. Argiri ve Yorgi v. Todori ve Grigi v. Nikola ve Yorgi v. Dimo ve Todoplakoman v. Miho ve Atanaş v. İzlo ve Atanaş v. Mokoliye ve Kiro v. İstamo ve Kosta v. Kiga vesâir ma‘lûmü’l-esâmî ve mahsûrü’l-eşhâs zimmîler taraflarından husûs-ı âti’l-beyâna vekîl oldukları yedlerinde olan vekâlet hücceti nâtıka olduğu üzere lede’ş-şer‘i’l-enver zâhir ve mütebeyyin olan Todoplakoman v. Miho ve Roşen v. İstamo ve Dimo v. Korto ve Grigi v. Nikola ve Pecka v. Kosta ve Mitro v. Verto nâm zimmîler ile Şipka karyesi ahâlîsinden ma‘lûmü’l-esâmî ve mahsûrü’l-eşhâs zimmîler taraflarından vekîl oldukları zâhir ve müte‘ayyin olan Kürkçü Anderya v. Kostantin ve Alekse v. Atanaş ve Manol v. Atanaş Vakıf ta‘bîr olunur varoş ahâlîsinden kezâlik ma‘lûmü’l-esâmî ve’l-eşhâs zimmîler taraflarından vekîl oldukları müte‘ayyin olan Koca Papas Yemandi ve Marko v. Milço ve Popostiçe karyesi ahâlîsinden ma‘lûmü’l-esâmî ve mahsûrü’l-eşhâs zimmîler taraflarından vekîl olduğu müte‘ayyin olan Petre v. Milo ve Puskinlik karyesi ahâlîsinden ma‘lûmü’l-esâmî ve mahsûrü’l-eşhâs zimmîler taraflarından vekîl olduğu müte‘ayyin olan İstavir v. Marko nâm zimmîler meclis-i şer‘-i şerîf-i enverde bin yüz kırk bir senesine mahsûb olmak üzere kazâ-i mezbûrun ehl-i zimmet cizyesi cibâyetine taraf-ı mîrîden me’mûr olup kırk senesinde İskapol ve tevâbi‘i ze‘âmeti karyeleri zâbiti olan el-Hâc Ahmed Ağa b. el-Hâc Mehmed b. Ali ile kırk iki senesine mahsûb olmak üzere kazâ-i mezbûrun ehl-i zimmet kefere cizyesinin taraf-ı mîrînden cibâyetine me’mûr olup kırk bir senesinden İskapol ve tevâbi‘i ze‘âmeti karyeleri zâbiti olan Moravî Haseki el-Hâc Ali Ağa b. Abdullah b. Abdulmennan tarafından sulh ve ibrâ-i âti’z-zikre vekîl olduğu Ahmed Bey b. Mehmed ve Ömer b. Mehmed nâm kimesneler şehâdetleriyle şer‘an sâbit olan râfi‘u’l-vesîka el-Hâc es-Seyyid Mehmed Ağa b. Abdülfettah mahzarında her biri bi’l-asâle ve bi’l-vekâle ikrâr ve takrîr-i kelâm edip müvekkil-i mezbûr el-Hâc Ahmed Ağa bin yüz kırk bir senesine mahsûb olmak üzere kazâ-i mezbûr kefere re‘âyâsının cizyeleri cibâyetine ve avârız ve bedel-i nüzûlleri tahsîline taraf-ı mîrîden me’mûr olduğundan mâ‘adâ kırk senesinde İskapol ve tevâbi‘i ze‘âmeti karyelerinin zâbiti ve mezbûr Haseki Hacı Ali Ağa kırk iki senesine mahsûb olmak üzere kazâ-i mezbûr kefere re‘âyâsının cizyeler cibâyetine avârız-ı dîvâniyye ve bedel-i nüzûlleri tahsîline taraf-ı mîrîden me’mûr olup ve kırk bir senesinde İskapol ve tevâbi‘i ze‘âmeti karyelerinin zâbiti olmağla yedlerinde olan tuğrâ-yı garrâ ile mahalli berat-ı âlîşândan ve emr ü defterden ziyâde iki senede bizden ve müvekkillerimiz olan kazâ-i mezbûr re‘âyâlarından otuz bin guruşumuzu bi-gayr-ı hakkın yedimizden ahz u kabz eyledi deyü da‘vâ ve mezbûrân mahâlline ihzâr olunmak bâbında yedimize iki kıt‘a emr-i âlîşân ihsân olunmağla beynimizde nizâ‘-ı kesîre vâki‘ olmuşidi. El-hâletü-hâzihi beynimize muslihûn tavassut edip da‘vâ-yı mezkûremizden vekîl-i mezbûr el-Hâc es-Seyyid Mehmed Ağa ile bizi iki bin guruş üzerine inşâ-i akd-i sulh eylediklerinde biz dahi sulh-ı mezbûru her birimiz bi’l-asâle ve bi’l-vekâle kabûl ve bedel-i sulh olan meblağ-ı mezbûr iki bin guruşu mezbûr el-Hâc es-Seyyid Mehmed Ağa yedinden tamamen ahz u kabz edip zikrolunan senelerde bizlerden ziyâde aldı deyü müdde‘âmız olan otuz bin guruşa vesâire müte‘allika âmme-i de‘âvî ve mutâlebât ve eymân ve muhâsamâtdan müvekkilân-ı mezbûrân el-Hâc Ahmed Ağa ve Haseki el-Hâc Ali Ağa’nın zimmetlerin ibrâ-i âmm-ı kātı‘u’n-nizâ‘la bi’l-asâle ve bi’l-vekâle ibrâ ve ıskāt eyledik vekîl-i mezbûr dahi bedel-i sulh deyü bize medfû‘u olan iki bin guruşa müte‘allika da‘vâdan zimmetimizi asâleten ve vekâleten ibrâ ve ıskāt etmekle min-ba‘d her birimizin âhar ile vechen mine’l-vücûh da‘vâ ve nizâ‘ ve husûmetimiz kalmadı dediklerinden sonra mezbûrân Kürkçü Anderya v. Kostantin ve Dimo v. Kureh ve Varis v. Marko v. Melaho’dan her biri ba‘de’l-yevm müvekkillerimiz zimmîyûn-ı merkūmun bizim vekâletimizi inkâr edip müvekkilân-ı mezbûrân el-Hâc Ahmed Ağa ve Haseki el-Hâc Ali Ağa’dan [43b] sinîn-i mezbûrede bizlerden berat-ı âlîşândan ve emr ü defterden ziyâde akçemiz aldılar deyü da‘vâ edip nesnelerini alırlar ise me’hûzlarına bizler kefîl ve dâmin olduk dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurre-i Zilhicceti’ş-şerîfe sene [1]143. Şuhûdü’l-hâl: Mustafa Efendi b. Ali, Kâtib Mevkūfâtî Mustafa Efendi b. es-Seyyid Mehmed, Şâmî Mehmed Efendi b. Mustafa kâtib-i dîvân, Merâmî Ahmed Efendi b. Mustafa kâtib-i dîvân, Çoban Ali Ağa b. Abdullah, İbrahim Efendi b. ( ) müezzin-i Gedikpaşa, Yâsin Efendi b. Ahmed imâm-ı Gedikpaşa, Mehmed Ağa b. Mahmud Pîrzâde, Mustafa Efendi b. İbrahim, Ebûbekir Efendi b. Mahmud Efendi, İsmail Bey b. Halil, Abdullah Ağa b. Abdurrahman, Abdurrahman Ağa s. Ali Ağa, Murad b. Mehmed tâbi‘-i Mehmed Ağa.