Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 187 Hüküm no: 175 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce Hatun’un kocası Mehmed Beşe’nin Tebriz’de hummadan öldüğü İstihbâr. Mahmiye-i İstanbul’da Fethiye Câmi‘-i şerîfi kurbünde Kâtib Muslihiddin mahallesinde sâkine bâ‘isetü’l-vesîka Hadîce bt. Ali nâm hatundan ber-vech-i âtî istihbâr-ı şer‘î sudûrundan sonra udûl-i ahrâr-ı ricâl-i Müslimînden Mehmed Efendi b. Abdullah ve Mehmed Çelebi b. Osman nâm kimesneler li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Hadîce Hatun’un zevci olup Dergâh-ı âlî yeniçerilerinin doksan yedi cemâ‘at yoldaşlarından Mehmed Beşe b. Abdullah b. Abdurrahman nâm kimesne târih-i kitâbdan dört sene mukaddem medîne-i Tebriz’de humma marazından bi-emrillâhi te‘âlâ hastalanıp maraz-ı merkūmdan vefât eylediğini re’yü’l-ayn müşâhade ve defn eyledik deyü her biri alâ-tarîkı’ş-şehâde haber vermeleriyle hıfzan li’l-makāl mâ-vaka‘a bi’t-taleb ketb olundu. Fî 5 Zilhicce sene [1]143. Şuhûdü’l-hâl: Mehmed Çelebi b. Abdullah bölükbaşı, Kādızâde İbrahim Çelebi du‘âcı, Yakub b. Abdullah muhzır, Salih Çelebi b. Süleyman.