Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 188 Hüküm no: 176 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun ile boşandığı Hayrullah Çelebi arasındaki mehir ve eşya davasının sulhla sonuçlandığı Ahz u kabz. Mahmiye-i İstanbul’da Seyyid Bey mahallesi sâkinelerinden olup zâtı ta‘rîf-i şer‘î ile mu‘arrefe olan Fâtıma bt. Veliyüddin nâm hatun meclis-i şer‘-i şerîf-i enverde zevci mutallakı râfi‘u’l-vesîka Hayrullah Çelebi b. Mustafa nâm kimesne mahzarında ikrâr ve takrîr-i kelâm edip bundan akdem mezbûr Hayrullah Çelebi’nin zevce-i menkûha-i medhûlün-bihâsı olduğum hâlde beni iki def‘a tatlîk etmekle iki def‘ada zimmetinde mütekarrir ve ma‘kūdün-aleyh olan ellişer guruşdan yüz guruş mehr-i müeccelimi ve nafaka-i iddet ve me’ûnet-i süknâmı ve eşyâ-i memlûkemden yedimden kabz ve istihlâk eylediği sîm buhûrdân ve gülâbdân [44a] vesâir eşyâmı mezbûr Hayrullah Çelebi’den da‘vâ ve taleb eylediğimde beynimize muslihûn tavassut edip mezbûr Hayrullah Çelebi ile beni üç yüz elli guruş üzerine sulh edip ve bedel-i sulh-ı mezbûru sekiz ay tamamında bana edâ ve teslîm eylemek üzere mezbûr Hayrullah Çelebi’yi tecîl etmişidim. El-hâletü-hâzihi müddet-i tecîl tamam olmağla meblağ-ı mezbûr üç yüz elli guruş ile mezbûr Hayrullah Çelebi’nin Yusuf Ağa nâm kimesneden emriyle benim kefâletime binâen istikrâz ve kabz ve istihlâk eylediği iki yüz on beş guruş mezbûr Yusuf Ağa bi-hükmi’l-kefâle benden kabz etmekle meblağ-ı mezbûr iki yüz on beş guruş ki min-haysü’l-mecmû‘ beş yüz altmış beş guruş mezbûr Hayrullah Çelebi tamamen ve kâmilen bana edâ ve teslîm edip ben dahi yedinden ahz u kabz ve tesellüm edip zikrolunan bedel-i sulh-ı mezbûr üç yüz elli guruş ile kefâletden hakkım olan iki yüz on beş guruşa müte‘allika da‘vâdan mezbûr Hayrullah Çelebi’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 min-Zilhicce sene [1]143. Şuhûdü’l-hâl: el-Hâc Halil Efendi b. İbrahim imâm-ı Gürânî, el-Hâc Mehmed Efendi b. Ahmed, Mustafa Çelebi b. Mehmed, İsmail Efendi b. Halil, İbrahim Efendi b. Mustafa imâm-ı Seyyid Bey, Molla İbrahim b. Halil, Mehmed Çelebi b. Osman, Mehmed efendi b. Hasan, Mehmed Ağa b. Osman Efendi, Ali Ağa b. Mahmud, Ahmed Çavuş silâhdâr.