Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 189 Hüküm no: 177 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un çocuğu için, boşandığı kocası Ebûbekir Çelebi’den nafaka talebi Nafaka. Mahmiye-i İstanbul’da Nahılbend mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Emine bt. İsmail nâm hatun meclis-i şer‘-i şerîf-i enverde zevc-i mutallıkı Ebûbekir Çelebi b. Abdülkadir nâm kimesne mahzarında takrîr-i kelâm ve bast-ı merâm edip mezbûr Ebûbekir Çelebi’nin firâşından hâsıl ve benden mütevellid bi-hakkı’l-hıdâne hacr ve terbiyemde olan sadrî oğlum işbu Mehmed’in mâlı olmamağla nafaka ve kisvesiʼçün kadr-ı mar‘ûf babası mezbûr üzerine akçe farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri dahi sagīr-i mezbûr Mehmed’in nafaka ve kisve vesâir levâzım-ı zarûriyesiʼçün babası mezbûr Ebûbekir Çelebi üzerine târih-i kitâbdan külle yevm bi’t-terâzî onar akçe nafaka ve kisve-bahâ farz ve takdîr edip meblağ-ı mefrûz-ı mezkûru sagīr-i mezbûrun nafaka ve kisve vesâir levâzım-ı zarûriyesiʼçün harc ve sarfa ve lede’l-iktizâ istidâneye ve inde’z-zafer babası mezbûr Ebûbekir Çelebi üzerine rücû‘a mezbûr Emine Hatun’a izin birle mâ-vaka‘a bi’t-taleb ketb olundu. Fî 7 Zilhicce sene [1]143. Şuhûdü’l-hâl: el-Hâc Ahmed ağa b. Mustafa, el-Hâc Salih Ağa b. İbrahim, Hâfız Süleyman Efendi, Tahtacı Mehmed Çelebi. Salih b. Süleyman, Ahmed b. Hasan.