Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 189 Hüküm no: 178 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım ile ortağı Ayşe Hatun arasındaki eşya davasının sulhla sonuçlandığı Husûs-ı âti’l-beyânın mahâllinde ketb ve tahrîri için bi’l-iltimâs savb-ı şer‘-i kavîmden irsâl olunan Mevlânâ es-Seyyid Feyzullah Efendi b. el-merhûm Abdülkerim Efendi mahmiye-i İstanbul’da Sancakdâr Hayreddin mahallesinde sâkine Fâtıma Hanım bt. Ali Efendi b. el-Hâc Yusuf ile ortağı Âişe Hatun bt. Mehmed’in ale’l-iştirâki’s-seviy mutasarrıfe oldukları vakıf menzillerine varıp zeyl-i vesîkada muharrerü’l-esâmî Müslimîn huzûrunda akd-i meclis-i şer‘-i nebevî ettikde zât-ı mahalle-i mezbûrede vâki‘ Hatuniye Câmi‘-i imâmı Ahmed Efendi b. el-Hâc İbrahim ve el-Hâc Hüseyin Çavuş Ağa b. Mehmed nâm kimesneler ta‘rîfleriyle mu‘arrefe olan <> mezbûre Fâtıma Hanım meclis-i ma‘kūd-ı mezkûrda yine mu‘arrifân-ı mezbûrân ta‘rîfleriyle mu‘arrefe olan ortağı bâ‘isetü’l-vesîka mezbûre Âişe Hatun mahzarında ikrâr-ı tâm ve takrîr-i kelâm edip hâlâ mezbûre Âişe Hatun’un yedinde mülk ve hakkı olan mecmû‘u iki yüz elli guruş kıymetli yirmi miskāl bir çift altın bilezik ve bir sagīr iki başlı cevâhir kuşak ve bir incili altın gerdânlık ve bir incili köstekli pendül sâ‘at ve bir müsta‘mel dîbâ entâri ve bir potin kavuşdurma ve iki hâre entâri ve bir gül şerbeti rengi hâre kavuşdurma ve bir kına rengi çuka dolmalı benim mâlım ile iştirâ etmişidik deyü bundan akdem mezbûre Âişe Hatun’dan kıymet-i mezbûresini taleb ve da‘vâ sadedinde olduğumda ol dahi inkâr eylediğinden mâ‘adâ cihet-i karz-ı şer‘îden zimmetinde yüz guruş hakkım vardır deyü benden da‘vâya tesâddî etmekle beynimizde münâza‘ât-ı kesîre ve muhâsamât-ı şedîde vâkı‘a olmuşidi. El-hâletü-hâzihi ben da‘vâ-yı mezkûremden fâriğa olduğumdan sonra yedinde mülk ve hakkım olup takrîben on yaşında olan işbu Gürciyyetü’l-asl Müslimetü’l-mille Dağıstan nâm câriyeyi mezbûre Âişe Hatun’a yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz guruşu mezbûre Âişe Hatun’a cihet-i karz-ı şer‘îden zimmetimde deynim olup benden mâ‘adâsı olan meblağ-ı mezbûr yüz guruş deynime takās ve mahsûb eylediğimde ol dahi mukāssa ve kabûl etmeğin eşyâ-i muharrere-i mezbûre ile kıymet-i mezkûrelerine ve câriye-i mezkûreye ve târih-i vesîkaya gelince [44b] sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve muhâsamâtdan ben mezbûre Âişe Hatun’un zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde mezbûre Âişe Hatun dahi kezâlik husûs-ı mezbûra ve târih-i vesîkaya gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve muhâsamâtdan benim zimmeti ibrâ-i âmm-ı râfi‘u’l-hısâm ile ibrâ ve ıskāt etmeğin min-ba‘d bir birimiz ile vechen mine’l-vücûh ve sebeben mine’l-esbâb kat‘a da‘vâ ve nizâ‘ımız kalmadı dedikde gıbbe’t-tasdîkı’ş-şer‘î vâki‘ hâl mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mehmed Çelebi b. Abdullah ve Mustafa b. Yusuf ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 7 min-Zilhicceti’ş-şerîfe sene [1]143. Şuhûdü’l-hâl: İmâm Ahmed Efendi b. el-Hâc İbrahim, el-Hâc Hüseyin Çavuş Ağa b. Mehmed, Mehmed Odabaşı b. Süleyman, İbrahim Beşe b. Süleyman, Mehmed Çelebi b. Abdullah, Mustafa b. Yusuf.