Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 190 Hüküm no: 179 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haksız yere para aldığı iddiasıyla İbrahim Ağa aleyhine açılan davanın sulhla sonuçlandığı Husûs-ı âti’l-beyânın mahâllinde ketb ve tahrîri için bi’l-iltimâs savb-ı şer‘-i enverden irsâl olunan Mevlânâ Mehmed Emîn Efendi mahmiye-i İstanbul’da Sadefciler sûku kurbünde vâki‘ Cezerî Kasım Paşa mahallesi sükkânından sâbıkā Defter emîni olan umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām Abdullah Efendi’nin menziline varıp zeyl-i rakīmde muharrerü’l-esâmî Müslimîn huzûrlarında akd-i meclis-i şer‘-i nebevî ettikde mahmiye-i mezbûrede Sürûri mahallesi ahâlîsinden iken bundan akdem vefât eden Eyyûbî Mustafa b. Abdullah b. Abdurrahman’ın verâseti anası Râbia Hatun bt. Abdi Çavuş ile li-üm karındaşı Mehmed b. Mustafa b. el-Hâc Hüseyin nâm kimesneye münhasıra ve tashîh-i mes’elesi bi-tarîkı’r-red üç sehimden olup sihâm-ı mezbûreden iki sehim mezbûre Râbia Hatun’a ve bir sehmi mezbûr Mehmed’e isâbet eylediği mütehakkık oldukdan sonra zâtı Abdullah Ağa b. Abdurrahman ve Mustafa Ağa b. Hasan ta‘rîfleriyle mu‘arrefe olan mezbûre Râbia Hatun asâleten ve mezbûr Mehmed Efendi tarafından husûs-ı âti’l-beyâna vekîl olduğu Hâfız Abdullah Efendi b. el-Hâc Ahmed ve Hüseyin Çelebi b. Hasan şehâdetleriyle sâbit ve sübût-i vekâletine hükm-i şer‘î lâhık olan Mehmed Ağa b. Salih nâm kimesne vekâleten meclis-i ma‘kūd-ı mezbûrda bâ‘isü’l-kitâb İbrahim Ağa b. el-mûmâ-ileyh Abdullah Efendi mahzarında her biri asâleten ve vekâleten ikrâr ve takrîr-i kelâm edip târih-i kitâbdan beş sene mukaddem mûrisimiz müteveffâ-yı mezbûr mûmâ-ileyh Abdullah Efendi’nin etbâ‘ından olmağın hâl-i marazında sandığından bi-gayr-ı hakkın üç yüz fındık altınını ahz u kabz ve mesârifine sarfla istihlâk etmişidi deyü mûmâ-ileyh İbrahim Ağa’dan taleb ve da‘vâ eylediğimizde ol dahi bi’l-külliye inkâr etmeğin beynimizde münâza‘ât-ı kesîre vâki‘a olmuşidi. El-hâletü-hâzihi beynimize muslihûn tavassut edip da‘vâ-yı mezkûremden bizi mûmâ-ileyh İbrahim Ağa ile an-inkâr yüz guruş üzerine sulh eylediklerinde biz dahi sulh-ı mezkûru kabûl ve bedel-i sulh olan meblağ-ı mezbûr yüz guruşu mûmâ-ileyh İbrahim Ağa yedinden bi-kadri’l-hısas tamamen ahz u kabz eylediğimizden sonra husûs-ı mezkûra müte‘allika âmme-i da‘vâdan biz mûmâ-ileyh İbrahim Ağa’nın zimmetini ibrâ ve ıskāt eylediğimizde ol dahi bedel-i sulh olan meblağ-ı mezbûra müte‘allika âmme-i da‘vâdan bizim zimmetimizi ibrâ ve ıskāt eyledi dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ma‘an ba‘s olunan Çukadâr Mehmed b. Ahmed ve muhzır Mehmed b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 6 Zilhicce sene [1]143. Şuhûdü’l-hâl: Fahrü’l-müderrisîni’l-kirâm Hüseyin Efendi b. el-merhûm Mustafa Efendi, es-Seyyid Salih Çelebi b. Ömer, Abdullah Çelebi b. el-Hâc Ahmed, Haseki Mehmed Ağa b. Yusuf, Aşçı Hüseyin Ağa b. Abdullah, Mehmed Çelebi b. Hasan, Hüseyin b. Hasan, Yeniköylü Mehmed Ağa b. İbrahim.