Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 191 Hüküm no: 180 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elvanzade mahallesinden Mehmed’in küçük kızı Ayşe için vasîsi vâsıtasıyla ev alındığı Mübâya‘a. Mahmiye-i İstanbul’da Nevbethâne kurbünde Elvanzâde mahallesinde sâkine olup zâtı Ahmed Ağa b. el-Hâc Ali ve Mahmud b. Bektaş ta‘rîfleriyle mu‘arrefe olan Âişe bt. Miço Mehmed Ağa nâm hatun meclis-i şer‘-i şerîf-i enverde bundan akdem vefât eden el-Hâc Mehmed b. Yunus’un sulbiye kızı bâ‘isetü hâze’l-kitâb diğer Âişe nâm sagīrenin min-kıbeli’l-eb ber-mûceb-i hüccet vasîyy-i muhtârı umdetü’l-eşbâh Yakub Ağa b. Abdullah mahzarında ikrâr-ı tâm ve takrîr-i kelâm edip arsası mârrü’z-zikr Elvanzâde vakfına senede iki yüz kırk akçe mukāta‘a ile tasarrufumda ve ebniyesi yedimde mülk ve hakkım olup mahalle-i mezbûrede vâki‘ bir tarafdan Sâliha Hatun menzili ve bir tarafdan Kasım Paşa odaları ve bir tarafdan tarîk-ı âm ile mahdûd dâhiliyesinde fevkānî üç bâb oda ve bir sofa ve dehliz ve kenîf ve tahtânî bir matbah ve mahtab ve bi’r-i mâ ve havlu ve hâriciyesinde fevkānî bir oda ve tahtânî bir oda ve ahır ve kenîfi [45a] müştemil menzilin ebniye-i memlûkesini bi-cümleti’t-tevâbi‘ ve’l-levâhık sagīre-i mezbûre için vasîyy-i mûmâ-ileyhe bin iki yüz kırk guruşa bey‘ ve temlîk ve teslîm ve arsa-i mezkûreyi bâ-ma‘rifet-i mütevellî iki yüz guruş bedel mukābelesinde ferâğ ve tefvîz eylediğimde ol dahi sagīre-i mezbûre için kıbel-i şer‘den bi’l-vesâye mâlıyla şirâya me’zûn olduğuna binâen ber-vech-i muharrer iştirâ ve temellük ve tesellüm ve tefevvüz ve kabûl eylediğinden sonra semen-i mezbûr ile bedel-i merkūm cem‘an dört yüz kırk guruşu sagīre-i mezbûre mâlından olmak üzere vasîyy-i mezbûr yedinden tamamen ahz u kabz ve menzil-i mezkûrun tagrîr ve gabnine müte‘allika âmme-i da‘vâdan sagīre-i mezbûre ile vasîyy-i mûmâ-ileyhin zimmetlerini ibrâ ve ıskāt eyledim fîmâ-ba‘d menzil-i mahdûd-ı mezkûr sagīre-i mezbûre Âişe’nin mülk-i müşterâsı olup kat‘a benim alâka ve medhalim kalmamışdır. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. mâ-vaka‘a bi’t-taleb ketb olundu. Fî 6 Zilhicceti’ş-şerîfe sene [1]143. Şuhûdü’l-hâl: Odabaşı Mustafa Ağa, Tahtacı Mehmed Çelebi b. Abdullah, İbrahim Çelebi b. Mustafa, Ahmed b. Hasan.