Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 196 Hüküm no: 186 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miftâhî Mustafa Ağa’nın kereste borcuyla takas olmak üzere Çobançavuş mahallesinde bulunan ev ve eşyasını sattığı Tarafeynden ibrâ. Bâ-imzâ-i hazret-i efendi. Husûs-ı âti’l-beyânın mahâllinde ketb ve tahrîri için bi’t-taleb kıbel-i şer‘den irsâl olunan Mevlânâ Hüseyin Efendi b. Mehmed Mahmiye-i İstanbul’da Çoban çavuş mahallesinde sâkin Sadrazam-ı sâbık merhûm İbrahim Paşa kethudâsı müteveffâ Mehmed Paşa etbâ‘ından Miftâhî Mustafa Ağa b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî ettikde keresteci tâifesinden Gülâbî v. Norsis nâm zimmî meclis-i ma‘kūd-ı mezkûrda işbu hâfızü’l-kitâb mezbûr Mustafa Ağa mahzarında ikrâr-ı tâm ve takrîr-i kelâm edip bundan akdem mezbûr Mustafa Ağa zimmetinde yedimde olan müfredât defteri mantûkunca kereste bahâsından üç bin guruş hakkım olmağla mezbûr Mustafa Ağa yedinde mülkü olup mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât dört bâb menzillerini iki bin dört yüz elli guruşa ve ber-mûceb-i defter-i müfredât eşyâ-i memlûke-i ma‘lûmesini beş yüz elli guruşa safka-i vâhide ile bana bey‘ ve temlîk ve semenleri olan cem‘an üç bin guruşu bâlâda mezkûr üç bin guruş deynine takās ve mahsûb eylediğine ben dahi ber-vech-i muharrer iştirâ ve temellük ve tesellüm ve mukāssa ve kabûl eylediğimden sonra menâzil-i mezkûre ve eşyâ-i merkūmenin gabn ve tagrîrine müte‘allika âmme-i de‘âvî ve kâffe-i mutâlebât ve eymân ve muhâsamâtdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik min-ba‘d husûs-ı mezkûreye müte‘allika bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Çukadâr Süleyman b. İbrahim ve el-Hâc Mehmed b. İbrahim ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Zilhicceti’ş-şerîfe sene [1]143. Şuhûdü’l-hâl: eş-Şâhidûnü’s-sâbıkūn.