Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 197 Hüküm no: 187 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun tarafından Ali Ağa’ya satılan ev arsasının parasını almak için kocasını vekil tayin ettiği Mahmiye-i İstanbul’da Yakub Ağa mahallesinde sâkine Ümmügülsüm bt. Abdullah b. Abdurrahman nâm hatunun zevci ve tarafından ber-vech-i âtî vekâlet iddi‘â eden Mehmed Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde bâ‘isü hâze’l-kitâb Ali Ağa b. Abdülfettah nâm kimesne mahzarında üzerine da‘vâ ve takrîr-i kelâm edip zevcem müvekkile-i mezbûre Ümmügülsüm Hatun’un akd-i âti’z-zikrin sudûruna değin yedinde mülk ve hakkı olup mahalle-i mezbûrede vâki‘ bir tarafdan Baltacızâde Mehmed Ağa mülkü ve bir tarafdan Ümmügülsüm nâm hatun mülkü ve bir tarafdan tarîk-ı hâs ve bir tarafdan tarîk-ı âm ile mahdûd ve üç tarafdan taş duvar ve bir bi’r-i mâ ve bir harâba müşrif hamamı müştemil tûlen ve arzen be-hesâb-ı terbî‘î dört yüz zirâ‘ <> muhterik mülk menzil arsasını bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile dört yüz elli guruş ile meclis-i akidde muzî‘a adedi nâ-ma‘lûm bir kabza fülûsu bundan akdem mezbûr Ali Ağa’ya bi’l-vekâle bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl etmişidi. Hâlâ semeni olan meblağ-ı mezbûr dört yüz elli guruşu mezbûr Ali Ağa’dan bi’l-vekâle taleb ve da‘vâ eylediğimde edâdan imtinâ‘ eder suâl olunup meblağ-ı mezbûr dört yüz elli guruşu bana edâ ve teslîme tenbîh olunmak [46b] murâdımdır dedikde gıbbe’s-suâl mezbûr Ali Ağa cevâbında fi’l-hakīka arsa-i mahdûde-i mezkûreyi mezbûr Mehmed Çelebi’den ber-vech-i muharrer iştirâ ve tesellüm eylediğini ikrâr lâkin ber-vech-i muharrer vekâleti ma‘lûmum değildir deyü inkâr edicek müdde‘î-yi mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden mahalle-i mezbûre sükkânından zât-ı mezbûreyi ma‘rifet-i şer‘iye ile ârifân İbrahim Çelebi b. Şa‘ban ve Mehmed Çelebi b. Hasan ve Hasan b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-yi mezbûrun zevce[si] Ümmügülsüm bt. Abdullah b. Abdurrahman nâm hatunun yedinde mülk ve hakkı olup mahalle-i mezbûrede vâki‘ bir tarafdan Baltacızâde Mehmed Ağa mülkü ve bir tarafdan Ümmügülsüm nâm hatun mülkü ve bir tarafdan tarîk-ı hâs ve bir tarafdan tarîk-ı âm ile mahdûd ve üç tarafdan taş duvar ve bir bi’r-i mâ ve bir harâba müşrif hamamı müştemil tûlen ve arzen be-hesâb-ı terbî‘î dört yüz zirâ‘ muhterik mülk menzil arsasını bundan akdem mezbûr Ali Ağa’ya ve semenini kabza zevci müdde‘î-yi mezbûr Mehmed Çelebi’yi bizim huzûrumuzda tarafından vekîl ve nâib-i menâb nasb ve ta‘yîn eyledikde ol dahi vekâlet-i mezbûreyi kabûl etmişidi. Müdde‘î-yi mezbûr Mehmed Çelebi zevcesi mezbûre Ümmügülsüm Hatun’un ber-vech-i muharrer vekîlidir. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Zilhicce sene 1143. Şuhûdü’l-hâl: Mehmed Efendi b. Veli, mahalle-i mezbûrun imâmı el-Hâc Hasan Efendi b. Süleyman, Çorbacı Mehmed Ağa b. Ali, Mustafa b. Ali, Berber Mehmed Çelebi b. Abdullah, Mehmed b. Hasan, Mehmed b. Mehmed, Halil birâderi, Mehmed Çelebi b. Abdullah, Salih b. Süleyman ve Kādızâde İbrahim.