Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 198 Hüküm no: 188 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzmir’de Namazgâh mahallesinden Fâtıma Hatun’un kendisine haksızlık yapıldığı gerekçesiyle açtığı davanın sulhla sonuçlandığı Sulh. Medîne-i İzmir’de Namazgâh mahallesi ahâlîsinden olup mahmiye-i İstanbul’da müsâfereten sâkine ve zâtı ta‘rîf-i şer‘î ile mu‘arrefe olan Fâtıma Hatun bt. el-Hâc Ahmed meclis-i şer‘-i şerîf-i enverde yine medîne-i mezbûre ahâlîsinden olup mahmiye-i mezbûrede müsâfiren sâkin râfi‘u’l-vesîka el-Hâc İbrahim b. Cafer nâm kimesne mahzarında ikrâr ve takrîr-i kelâm edip mezbûr el-Hâc İbrahim medîne-i mezbûrede beni bi-gayr-ı hakkın ahz u habs edip mâlımdan ve yedimden yedi yüz guruşumu ahz u kabz eyledi deyü mezbûr el-Hâc İbrahim’den da‘vâ sadedinde olduğumda beynimizde münâza‘ât-ı kesîre vâkı‘a olmuşidi. El-hâletü-hâzihi beynimize muslihûn tavassut edip da‘vâ-yı mezkûremden mezbûr el-Hâc İbrahim ile beni on beş guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan on beş guruşu yedinden bi’t-tamam ve’l-kemâl ahz u kabz edip meblağ-ı mezkûra müte‘allika da‘vâdan mezbûr el-Hâc İbrahim’in zimmetini ibrâ ve ıskāt eylediğimde ol dahi kabûl ve bedel-i sulh deyü bana medfû‘u olan on beş guruşa müte‘allika da‘vâdan benim zimmetimi ibrâ ve ıskāt eyledi min-ba‘d ehadühümânın âhar ile da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 14 Zilhicce sene [1]143. Şuhûdü’l-hâl: Babûcîzâde Mehmed Efendi, Bıçakcı? dâmadı Süleyman Efendi, Mataracı yeğeni Mustafa Çelebi, Genç Osman Ağa, Ali Efendi el-müderris, Cekcuzâde? el-Hâc Hasan, Ahmed Efendi b. Ebûbekir Efendi.