Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 201 Hüküm no: 191 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın Ayakkabıcı Ömer’e olan borcunun ödenmesi Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’l-kitâb Haffâf Ömer Çelebi b. Halil nâm kimesne meclis-i şer‘-i şerîf-i enverde müteveffâ-yı merkūmun emvâl ve eşyâsı taraf-ı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı olan izzetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın yedimde olan musahhah müfredât defteri mantûkunca kendiye ve etbâ‘ına bin yüz otuz yedi senesi ibtidâsından kırk üç senesi Rebî‘ülevveli’nin on beşinci gününe gelince mâlımdan verdiğim çizme ve bapuç ve mest semenlerinden ba‘de küllî kabz ve hesâb zimmetlerinde iki bin yüz kırk sekiz guruş hakkım olup hatta hayatlarında ikrâr ve işhâd edip kable’l-edâ fevt olmağla meblağ-ı mezkûru tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Seyfullah Ağa b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olundukda fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında kırk üç senesi [47b] Rebî‘ülevveli’nin on beşinci gününe gelince müdde‘î-yi merkūm Haffâf Ömer Çelebi yedinden iştirâ olunan çizme ve papuş ve mest semenlerinden ba‘de küllî kabz ve hesâb zimmetimde merkūm Ömer Çelebi’ye iki bin yüz kırk sekiz guruş deynimdir deyü bizim huzûrumuzda ikrâr ve bizi işhâd etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-mu‘teber mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘de li-sene 1143 Şuhûdü’l-hâl: eş-Şâhidûnü’s-sâbıkūn.