Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 202 Hüküm no: 192 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın yağlıkcı Abdülkadir’e olan borcunun ödenmesi Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’l-kitâb yağlıkcı Abdülkadir Çelebi b. Abdülkadir meclis-i şer‘-i şerîf-i enverde müteveffâ-yı merkūmun emvâl [ve] eşyâsı tarafı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı olan izzetlü sa‘âdetlü Ali Efendi hazretlerinin re’y ve ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman hayatında yedimde olan müfredât defteri mantûkunca bey‘ ve emirleriyle mahâlline teslîm eylediğim yağlıkcı metâ‘ı semeninden zimmetlerinde bin iki yüz guruş hakkım olup hatta müteveffâ-yı merkūm hayatında meblağ-ı mezbûr zimmetlerinde bana vâcibü’l-edâ deynleri olduğunu huzûr-ı Müslimînde ikrâr ve işhâd dahi edip kable’l-edâ fevt olmağla tereke-i vâfiyesinden taleb ederim suâl olunup meblağ-ı mezbûrun edâsıyla mûmâ-ileyh Merâmî Ahmed Efendi’ye kıbel-i şer‘den tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden olup müteveffâ-yı merkūmun hayatında etbâ‘ından Yusuf Ağa b. el-Hâc Halil ve el-Hâc Abdullah b. el-Hâc Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olundukda fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Yağlıkcı Abdülkadir Çelebi b. Abdülkadir yedinden iştirâ olunup emrimle mahâlline teslîm eylediği yağılıkcı metâ‘ semeninden merkūm Abdülkadir Çelebi’ye zimmetimde bin iki yüz guruş vâcibü’l-edâ ve lâzımü’l-kazâ deynimdir deyü huzûrumuzda ikrâr ve bizi işhâd <> etmişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın mezbûr Abdülkadir Çelebi gıbbe’t-tahlîfi’l-mu‘teberi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Ömer Çelebi b. Halil sahhâf, el-Hâc Abdullah b. el-Hâc Hüseyin yorganî, el-Hâc Mustafa b. İbrahim sarrâc, Ali b. Mustafa, el-Hâc İbrahim Bey b. Receb, Mehmed Çelebi b. Ahmed, el-Hâc Mustafa Ağa b. Abdullah vekîlharc, Abdülkadir Çelebi b. Abdülkadir yağlıkcı, Mehmed Çelebi b. el-Hâc Mustafa.