Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 203 Hüküm no: 193 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Paşa’nın kethudâsı olup hazinece terekesine el konulan Mehmed Paşa’nın aşçıbaşı Hasan’a olan borcunun ödenmesi Sadrazam-ı sâbık merhûm İbrahim Paşa kethudâsı müteveffâ Mehmed Paşa b. el-Hâc Mustafa b. Abdurrahman’ın dâyinlerinden râfi‘u’l-kitâb Aşçıbaşı Hasan Bey b. Süleyman nâm kimesne meclis-i şer‘-i şerîf-i enverde müteveffâ-yı merkūmun emvâl [ve] eşyâsı tarafı mîrîden kabz olunmağla ashâb-ı hukūk ile mürâfa‘a ve muhâsama ve ba‘de’s-sübût düyûnunu îfâya hâlâ Şıkk-ı evvel defterdârı olan izzetlü sa‘âdetlü Ali Efendi hazretlerinin re’y [ve] ma‘rifetleriyle kıbel-i şer‘den kayyım nasb ve ta‘yîn olunan Tezkire-i mâliye Merâmî Ahmed Efendi mahzarlarında üzerine da‘vâ ve takrîr-i kelâm edip müteveffâ-yı merkūm Mehmed Paşa b. el-Hâc Mustafa b. Abdurrahman’ın hayatında aşçısı olduğum hâlde yamaklarım olan ma‘lûmü’l-esâmî ve’l-eşhâs aşçılara [48a] ve yamaklara iki buçuk ayda lâzım gelen ücret-i ma‘lûmlarına bi-şarti’r-rücû‘ mâlımdan emriyle verdiğim sekiz yüz altmış guruş zimmetlerinde hakkım müctemi‘ olup hatta müteveffâ-yı merkūm hayatında meblağ-ı mezbûr zimmetlerinde bana vâcibü’l-edâ ve lâzımü’l-kazâ deyni olduğunu alâ-ruûsi işhâd ikrâr ve işhâd edip kable’l-edâ <> fevt olmağla tereke-i vâfiyesinden taleb ederim suâl olunup edâsıyla tenbîh olunmak murâdımdır dedikde gıbbe’s-suâl ve akībe’l-inkâr ve isre talebi’l-beyyine udûl-i ahrâr-ı ricâl-i Müslimînden ve müteveffâ-yı merkūmun hayatında etbâ‘ından Seyfullah b. Abdullah ve Miftâhî Mustafa Ağa b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Mehmed Paşa b. el-Hâc Mustafa b. Abdurrahman hayatında Aşçıbaşı Hasan Bey yamakları olan ma‘lûmü’l-esâmî ve’l-eşhâs aşçılara ve akkâmlara emrimle bi-şarti’r-rücû‘ mâlından iki buçuk ayda verdiği ücretlerden merkūm Aşçıbaşı Hasan Bey’e sekiz yüz altmış guruş zimmetimde vâcibü’l-edâ ve lâzımü’l-kazâ deynimdir deyü bizim huzûrumuzda ikrâr ve bizi işhâd eylemişidi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde bâde’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene selâse ve erba‘în ve mie ve elf. Şuhûdü’l-hâl: Ömer Çelebi b. Halil haffâf, el-Hâc Abdullah b. el-Hâc Hüseyin Yorganî, el-Hâc İbrahim Bey b. el-Hâc Receb, el-Hâc Mustafa b. İbrahim sarrâc, el-Hâc Mustafa Ağa b. Abdullah vekîlharc, Mehmed b. Hacı Mustafa yağlıkcı, Abdülkadir b. Abdülkadir yağlıkcı