Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 221 Hüküm no: 214 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in Nalçacı Hasan para vakfına olan borcunun terekesinden ödenmesi Na‘lçacı Hasan nâm sahibü’l-hayrın nukūd-ı mevkūfesine bi’l-fi‘il mütevellî olan Mehmed Çelebi b. Mustafa nâm kimesne meclis-i şer‘-i şerîf-i enverde mahmiye-i İstanbul’da Eğrikapı dâhilinde el-Hâc İlyas mahallesinde sâkin iken bundan akdem vefât eden Mehmed b. Hüseyin b. Abdullah’ın terekesine vâzı‘atü’l-yed olan zevce-i menkûha-i metrûkesi Âişe bt. Abdullah ile vâlidesi diğer Âişe bt, Abdurrahman ve sulbiye kebîre kızları Fâtıma ve Emine nâm hatunlar mahzarlarında üzerlerine da‘vâ ve takrîr-i kelâm edip müteveffâ-yı mezbûra hâl-i [hayat ve ] kemâl-i sıhhatinde mal-ı vakf-ı mezbûrdan kırk sekiz guruş ikrâz ve teslîm eylediğimde ol dahi iktirâz ve tesellüm ve kabz eylediğinden sonra meblağ-ı mezbûrun otuz yedi guruşunu cânib-i vakfa edâ ve teslîm ben dahi bi’t-tevliye ahz u kabz edip mâ‘adâ on bir guruşu bâkī kalıp hatta müteveffâ-yı mezbûr hâl-i hayatında ve kemâl-i sıhhatinde meblağ-ı bâkī-i mezbûr on bir guruş zimmetinde cânib-i vakfa edâsı lâzım deyni olduğunu lede’ş-şuhûd ikrâr ve işhâd etmeğin hâlâ meblağ-ı mezbûr on bir guruşu tereke-i vâfiyesinden bi’t-tevliye taleb ederim suâl olunup alıverilmesi murâdımdır dedikde gıbbe’s-suâl verese-i mezkûrûn cevâblarında müteveffâ-yı mezbûrun terekesine bi’l-verâse vaz‘-ı yedlerini ikrâr lâkin deyn-i mezkûru inkâr etmeleriyle müdde‘î-yi mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Mehmed Çelebi b. el-Hâc Yusuf ve Ahmed Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Mehmed b. Hüseyin b. Abdullah hâl-i hayatında ve kemâl-i sıhhatinde mal-ı vakf-ı mezbûrdan olmak üzere işbu müdde‘î-yi mezbûr Mehmed Çelebi yedinden kırk sekiz guruş ikrâz ve kabz eylediğinden sonra meblağ-ı mezbûrun otuz guruşunu cânib-i vakfa edâ ve teslîm edip mâ‘adâsı olan on bir guruş cânib-i vakfa zimmetinde edâsı lâzım deyni olduğunu huzûrumuzda ikrâr ve bizi işhâd eyledi. Hâlâ müdde‘î-yi mezbûr için meblağ-ı mezbûr on bir guruşu müteveffâ-yı mezbûrun tereke-i vâfiyesinden hakk-ı taleb ve ahz vardır. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i [54a] şer‘iye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm ve’t-tenbîh bi’t-taleb ketb olundu. Fî 22 Zilhicce sene [1]143. Şuhûdü’l-hâl: Mehmed Çelebi b. Mustafa, Ahmed Çelebi b. Mustafa, Mehmed b. el-Hâc Yusuf, Mehmed Çelebi b. Abdullah tahtacı.