Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 222 Hüküm no: 215 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber İsmail’in Kanlı mahallesindeki evini sattığı Mübâya‘a ve arsası tevcîh. Medîne-i Hazret-i Ebî Eyüb el-Ensârî aleyhirahmetü rabbihi’l-Bârî mahallâtından İslâm Bey mahallesinde sâkin Berber el-Hâc İsmail b. el-Hâc Mehmed meclis-i şer‘-i şerîf-i enverde mahmiye-i İstanbul’da Sultan Ahmed Han tâbe serâhu Câmi‘-i şerîfi kurbünde Kanlı mahallesinde sâkine sahibetü hâze’l-kitâb mefharu’l-muhadderât iffetlü Emine Hanım bt. el-müvellâ el-merhûm Süleyman Efendi tarafından husûs-ı âti’l-beyânı tasdîka vekîl-i şer‘îsi olan fahrü’l-kuzât Hüseyin Efendi b. Mehmed mahzarında ikrâr-ı tâm ve takrîr-i kelâm edip mahalle-i mezbûrede vâki‘ bir tarafdan Derzi Ahmed mülkü ve bir tarafdan Süleyman Beşe mülkü ve bir tarafdan Müezzin Mehmed Çelebi mülkü ve bir tarafdan tarîk-ı âm ile mahdûd fevkānî üç bâb oda ve dehliz ve iki bâb tahtânî oda ve bir bi’r-i mâ ve kenîf ve zât-ı eşcâr-ı müsmire ve gayr-ı müsmire bahçeyi müştemil menzilin ber-mûceb-i hüccet ebniye-i mezkûresini akd-i âtî sudûruna değin yedimde mülk ve hakkım olup arsası tevcîh-i hâkimü’ş-şer‘le tasarrufunda olmağın ebniye-i mezkûreyi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile dört yüz on guruşa müvekkile-i mûmâ-ileyhâ Emine Hanım’a bey‘ ve temlîk ve teslîm ve arsa-i mezkûreden kasr-ı yed eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semen-i mezbûr dört yüz on guruşu müvekkile-i merkūme mâlından olmak üzere vekîl-i mezbûr yedinden tamamen ahz u kabz eyledim dedikde gıbbe’t-tasdîkı’ş-şer‘î arsa-i mezkûre sulhen ve sâlimeten meşrûta vakıf olmağla mezbûre Emine Hanım sâlihâtdan süknâya muhtâc idiği zeyl-i kitâbda muharrerü’l-esâmî Müslimîn haberleriyle müte‘ayyin olmağın arsa-i mezkûre kıbel-i şer‘den müvekkile-i mezbûre Emine Hanım’a tevcîh olunup mâ-vaka‘a bi’t-taleb ketb olundu. Fî 22 min-Zilhicceti’ş-şerîfe sene [1]143. Şuhûdü’l-hâl: Fahrü’l-müderisîni’l-kirâm Osman Efendi b. Şa‘ban, Fahrü’l-müderisîni’l-kirâm es-Seyyid Osman Efendi, Rûhî Efendi b. Ahmed Efendi, Hasan b. Hüseyin.