Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 223 Hüküm no: 216 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtipkasım mahallesinden Sima bt. Sahak’ın terekesinin vârisleri arasında taksimi Mahmiye-i İstanbul’da Kâtib Kasım mahallesi sâkinelerinden iken bundan akdem hâlike olan Sima bt. Sahak v. Melkist nâm Ermeniye’nin verâseti zevci Avanis v. Artin ile anası Nazlı bt. Kanber’e ve babası mezbûr Sahak ve sadrı kebîr oğulları Nikigos ve Ahron ve kebîre kızları Ahısbet ve Sekuphi’ye münhasıra ve tashîh-i mes’elesi yetmiş iki sehimden olup sihâm-ı mezkûreden on sekiz sehim zevci mezbûr Avanis’e ve on ikişer sehim mezbûrân Sahak ve Nazlı’dan her birine ve onar sehim mezbûrân Ni[ko]gos ve Ahron’dan her birine ve beşer sehim mezbûretân Ahısbet ve Sekubhi’den her birine isâbet ve intikāl eylediği şer‘an müte‘ayyin oldukdan sonra işbu bâ‘isü’l-vesîka Ni[ko]gos ve Ahron meclis-i şer‘-i şerîf-i enverde verese-i mezkûre muvâcehelerinde her biri ikrâr-ı tâm ve takrîr-i kelâm edip mûrisimiz hâlike-i mezbûrenin terekesinden olup mahalle-i mezbûrede vâki‘ bir tarafdan ceddimiz merkūm Sahak mülkü ve bir tarafdan Üzümcü Karabet mülkü ve bir tarafdan Kuyumcu Manuk ve Sarrâf Avram mülkleri ve bir tarafdan tarîk-ı âm ile mahdûd fevkānî bir oda ve sofa ve köşk ve tahtânî iki oda ve sofa ve sahrınç ve bir mikdâr bahçeyi muhtevî menzil ve menzil-i mezkûra muttasıl iki bâb fevkānî ve tahtânî oda ve sofa ve kenîf ve sahrınç ve havluyu muhtevî menzilden tashîh-i mezkûr üzere babamız mezbûr Avanis kendiye isâbet eden on sekiz sehim hisse-i irsiyesini bi’l-asâle yüz guruşa ve kızları mezbûretân Ahısbet ve Sekubhi taraflarından husûs-ı âti’z-zikre vekîlleri olduğu mahalle-i mezbûre imâmı Mustafa Efendi b. Nasuh ve Hasan Beşe b. Ali şehâdetleriyle şer‘an sâbit olan mezbûr Avanis mezbûretâna ber-vech-i muharrer isâbet eden beşer sehimden on sehim hisse-i irsiyelerini ikişer yüz onar guruşdan dört yüz yirmi guruşa ve ceddimiz mezbûr Sahak kendiye isâbet eden on iki sehim hisse-i irsiyesini bi’l-asâle üç yüz guruşa ve cedde-i mezbûre Nazlı’ya isâbet eden on iki sehim hisse-i irsiyesini tarafından ber-vech-i muharrer vekîl olduğu mezbûrân Mustafa Efendi ve Hasan Beşe şehâdetleriyle şer‘an sâbit olan mezbûr Sahak bi’l-vekâle yüz guruşa bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık [54b] tarafeynden îcâb ve kabûlü hâvî bey‘-ı bâtt-ı sahîh-i şer‘î ile her biri bi’l-asâle ve bi’l-vekâle ale’l-iştirâki’s-seviy bize bey‘ ve temlîk ve teslîm eylediklerinde biz dahi ber-vech-i muharrer iştirâ ve temellük ve tesellüm ve kabûl ve semenleri olan cem‘an dokuz yüz yirmi guruşu her biri bi-kadri’l-hısas minvâl-i meşrûh üzere yedimizden asâleten ve vekâleten ahz u kabz eylediğinden sonra mârrü’z-zikr menzillerde ve hâlike-i mezbûrenin celîl ü hakīr huliy ve esâs-ı beyt ve evânî-i nühâsiye ve gayr-ı nühâsiye ve bi’l-cümle ism-i mâl ıtlâk olunur terekesine müte‘allika âmme-i de‘âvî ve mutâlebât ve muhâsamâtdan bizim zimmetimizi her biri ba‘de’l-ibrâ ve’l-kabûl babamız ve ceddimiz Avanis ve Sahak’dan suâl olunup takrîrleri tahrîr ve hüccet olunmak matlûbumdur dediklerinde gıbbe’s-suâl mezbûrân Avanis ve Sahak cevâblarında fi’l-hakīka kazıyye bâlâda tafsîl ve beyân ve şerh ve ayân olunan vech üzeredir deyü mezbûrân Nikogos ve Ahron’i cemî‘ kelimât-ı meşrûhalarında vicâhen ve şifâhen her biri tasdîk ve tahkīk etmeğin mâ-vaka‘a bi’t-taleb ketb olundu. Fî 26 min-Zilhicceti’ş-şerîfe sene [1]143. Şuhûdü’l-hâl: Mustafa Efendi b. Nasuh el-imâm, el-Hâc Mehmed b. Mustafa, Hasan Beşe b. Ali, Berber Mehmed Çelebi b. Mustafa, Mehmed Çelebi b. Abdullah, Du‘âcı İbrahim b. Mustafa, Papa Avram v. Nikogos, Papa Artin v. Haçador, Agop v. Sürur, Artin v. Karabet, Papa Aleksan v. Mıgırdıç, Bahşi v. Palo, Avram v. Husar, Sergiz v. İstefan.