Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 224 Hüküm no: 217 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasabilyas mahallesinden Sâliha bt. Abdullah’ın vefâen sattığı evini geri aldığı Mahmiye-i İstanbul’da Gül Câmi‘-i şerîf mahallesi ahâlîsinden fahrü’l-eşbâh bâ‘isü hâze’l-kitâb el-Hâc Ahmed Ağa b. Mustafa meclis-i şer‘-i şerîf-i enverde Sâliha bt. Abdullah nâm hatun mahzarında ikrâr-ı tâm ve takrîr-i kelâm edip mezbûre Sâliha Kasab İlyas mahallesinde vâki‘ lede’l-ahâlî ve’l-cîrân ma‘lûmü’l-hudûd mülk menzilini bin yüz kırk iki senesi Rebî‘ülevveli’nin yirmi üçüncü günü târih-i mezbûrdan üç yüz altmış bir gün tamamına değin bey‘-ı bi’l-vefâ tarîki üzere üç yüz kırk guruşa bana bey‘ ve teslîm eylediğinde ben dahi ber-vech-i muharrer iştirâ ve kabz ve tesellüm etmişidim. Hâlâ mezbûre Sâliha meblağ-ı mezbûr üç yüz kırk guruşu tamamen bana edâ ve teslîm edip ben dahi ber-vech-i muharrer kabz ve tesellüm ve fekk-i rehn etmekle husûs-ı mezkûra ve târih-i kitâba gelince âmme-i da‘vâ ve kâffe-i mutâlebât ve eymân ve muhâsamâtdan ben mezbûre Sâliha’nın zimmetini ibrâ-i âmm-ı râfi‘u’l-hısâm ile ibrâ ve ıskāt eylediğimde mezbûre Sâliha dahi husûs-ı mezkûra ve târih-i kitâba gelince âmme-i da‘vâ ve kâffe-i mutâlebât ve eymân ve muhâsamâtdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Muharrem sene [1]144. Şuhûdü’l-hâl: Mehmed Ağa b. Süleyman, Mehmed Çelebi b. Veli, el-Hâc Mehmed b. Receb, Mustafa Ağa b. Mehmed, Halil Efendi b. Abdullah.