Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 234 Hüküm no: 231 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe’nin kiracısı olduğu keresteci dükkânını boşaltıktan sonra yaptığı masrafı dükkân sahibi Numan Beşe’den talebi Sulh. Keresteci tâifesinden İsmail Beşe b. Ahmed nâm kimesne meclis-i şer‘-i şerîf-i enverde ashâb-ı hâze’l-kitâb Nu‘man Beşe b. el-Hâc Mustafa ile zikri âtî keresteci dükkânına şerîkler olan vâlidesi Fâtıma bt. Abdullah ve kız karındaşı Safiye Hatun mahzarlarında ikrâr ve takrîr-i kelâm edip bundan akdem ben mezbûrûnun mahmiye-i İstanbul’da Odunkapısı hâricinde vâki‘ keresteci dükkânlarında müste’cirleri olup dükkân-ı mezbûru tahliye ve kendilere teslîm eylediğimden sonra dükkân-ı mezkûrun imâret ve meremmetine bi-şarti’r-rücû‘ emirleriyle mâlımdan masrûfum olan yüz guruşu mezbûrûndan taleb ve da‘vâya tesâddî eylediğimde onlar dahi ba‘de’l-inkâr beynimize muslihûn tavassut edip da‘vâ-yı mezkûremden beni mezbûrûn ile an-inkâr on guruş üzerine musâlaha eylediklerinde ben dahi sulh-ı mezkûru kabûl ve bedel-i sulh mezkûr on guruşu mezbûr Nu‘man Beşe yedinden ahz u kabz eylediğimden sonra husûs-ı mezkûra müte‘allika âmme-i da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn min-Zilka‘deti’ş-şerîfe sene [1]143. Şuhûdü’l-hâl: Kethudâ Mustafa Ağa b. el-Hâc Mehmed, Yiğitbaşı Mehmed b. Süleyman, es-Seyyid Abdullah Çelebi b. es-Seyyid Mustafa, Halil Ağa b. Ahmed, es-Seyyid el-Hâc Ömer b. es-Seyyid Abdurrahman, es-Seyyid Osman Çelebi b. es-Seyyid Veli, el-Hâc Mehmed b. el-Hâc Ömer.