Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 235 Hüküm no: 232 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Osman’ın boşandığı kocasıda olan mehrini sulh yoluyla aldığı Sulh. Mahmiye-i İstanbul’da Ali Paşa mahallesinde sâkine olup zâtı es-Seyyid Mahmud b. Ahmed ve Molla Hüseyin b. Mustafa ta‘rîfleriyle mu‘arrefe olan Emine bt. Osman nâm hatun meclis-i şer‘-i şerîf-i enverde zevci mutallıkı işbu bâ‘isü’l-vesîka Mehmed b. Mustafa mahzarında ikrâr-ı tâm ve takrîr-i kelâm edip mezbûr Mehmed zevcim olup târih-i kitâbdan beş ay mukaddem beni bâyinen tatlîk etmekle zimmetinde mütekarrir ve ma‘kūdün-aleyh üç bin dört yüz akçe mehr-i müeccelimi mezbûr Mehmed’den taleb ve da‘vâ eylediğimde beynimizde münâza‘ât-ı kesîre vâkı‘a olmuşidi. El-hâletü-hâzihi beynimize muslihûn tavassut edip da‘vâ-yı mezkûremden beni mezbûr Mehmed ile iki bin dört yüz akçeye sulh eylediklerinde ben dahi sulh-ı mezkûru kabûl ve bedel-i sulh-ı mezkûrdan bin iki yüz akçesini yedinden ba‘de’l-kabz mâ‘adâ bin iki yüz akçeyi def‘aten edâya iktidârı olmamağın tecîle tâlib olduğu ecilden meblağ-ı mezkûr bin iki yüz akçeyi târih-i kitâbdan altmış bir gün tamamına değin bana edâ ve teslîm etmek üzere tecîl eylediğimde ol dahi ba‘de’l-kabûl meblağ-ı müeccel-i mezkûrdan mâ‘adâ hukūk-ı zevciyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Zilhicceti’ş-şerîfe sene [1]143. Şuhûdü’l-hâl: Mehmed Çelebi b. Abdullah, İbrahim Çelebi b. Mustafa, Ahmed Çelebi b. Hasan, Mehmed Çelebi b. Ahmed.