Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 235 Hüküm no: 233 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simaven v. Markar’ı boğarak öldürenler ile vârisleri arasındaki diyet davasının sulhla sonuçlandığı Sulh. Mahmiye-i İstanbul’da Langa Yenikapısı dâhilinde Çakırağa mahallesi ahâlîsinden olup ber-vech-i âtî hâlik olan Simaven v. Markar v. Kirkor’un verâseti anası Şehzede bt. Manuk nâm <> Ermeniye ile babası mezbûr Markar’a münhasıra olduğu şer‘an müte‘ayyin oldukdan sonra kendi nefsinden asâleten ve mezbûr Markar ma‘tûh ve hafîfü’l-akl olduğu lede’ş-şer‘i’l-enver müte‘ayyin ve umûruna kıbel-i şer‘den vasî nasb ve ta‘yîn olunan zevcesi mezbûre Şehzede zâtı ta‘rîf-i şer‘î ile mu‘arrefe olduğu hâlde meclis-i şer‘-i şerîf-i şerîfde işbu ashâbü’s-sifr Dîbâcı Asvador v. Sergiz ve Bükücü Delot v. Agya ve Basmacı Avadik v. Bagdasar ve refîkleri gāibûn ani’l-meclis Berber Ahmed ve Basmacı Cihan ve Bıçakcı Asvador târih-i kitâb senesi Şa‘bâni’l-mu‘azzamı’nın onuncu günü oğlum mezbûr Simaven’i ayardıp zikrolunan Yenikapı hâricinde vâki‘ mesfûr Asvador odasında boğup katletmeleriyle mûceb-i şer‘îsini mezbûrûndan taleb ve da‘vâya tesâddî eylediğimde beynimizde nizâ‘-ı küllî cereyânından sonra beynimize muslihûn tavassut edip da‘vâ-yı mezkûremden beni mezbûrûn Dîbâcı Asvador ve Gögücü [Bükücü] Delot ve Basmacı Avadik ile an-inkâr yüz elli guruş üzerine musâlaha eylediklerinde ben dahi asâleten ve vesâyeten sulh-ı mezbûru kabûl ve bedel-i sulh-ı mezkûr yüz elli guruşu mezbûrûn yedlerinden ahz u kabz eylediğimden sonra oğlum hâlik-i mezbûrun diyetine müte‘allika âmme-i da‘vâdan ancak mezbûrûn Dîbâcı Asvador ve Delot ve Avadik’i ibrâ-i âmm-ı râfi‘u’l-hısâm ile bi’l-asâle ibrâ ve ıskāt eylediğimde onlar dahi bana ber-vech-i muharrer medfû‘ları olan [58a] meblağ-ı mezbûr yüz elli guruş da‘vâsından beni ibrâ ve ıskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 Zilhicce sene [1]143. Şuhûdü’l-hâl: Emîn Mehmed Efendi el-kâtib, es-Seyyid Osman Beşe b. Mustafa, Abdurrahman b. Ramazan, Du‘âcı İbrahim b. Mustafa, Mustafa b. Hasan, Mehmed Çelebi b. Abdullah, Mehmed Çelebi kapıkethudâsı el-mübâşir, Süleyman Beşe b. Ahmed, Abdurrahman Beşe b. Ramazan.