Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 236 Hüküm no: 234 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan Ayşe’nin kocası Yahudi Yasef’den alacağı olan mehir ve eşya davasının sulhla sonçulandığı Sulh. Mahmiye-i İstanbul’da Topkapısı kurbünde Bâyezid Ağa mahallesinde sâkine olup zâtı tercümanları Ahmed Çelebi b. Mahmud ve Ahmed b. Abdullah ta‘rîfleriyle mu‘arrefe olan Âişe bt. Abdullah nâm mühtediye hatun meclis-i şer‘-i şerîf-i enverde sâbıkā zevci bâ‘isü hâze’s-sifr Yasef v. Harun v. Yasef nâm Yahûdî’nin babası ve tarafından husûs-ı âti’l-beyâna vekîl olduğu diğer Yasef v. Menteş ve âhar Yasef v. Benyamin nâm Yahûdiler şehâdetleriyle şer‘an sâbit olan merkūm Harun muvâcehesinde ikrâr ve takrîr-i kelâm edip bi-lutfillâhi te‘âlâ-ben bundan akdem şeref-i İslâm ile müşerref olup zevcim müvekkil-i mezbûr Yasef’den mübâne olmamla mesfûr Yasef zimmetinde mütekarrir ve ma‘kūdün-aleyh beş yüz guruş mehr-i müeccel ve ber-mûceb-i defter-i müfredât yedimden makbûzu olan eşyâ-i memlûke-i ma‘lûmem mevcûd ise a‘yânın müstehleke ise ba‘de’s-sübût kıymet-i şer‘iyelerini taleb ve da‘vâya mezbûr Yasef üzerine tesâddî eylediğimde beynimizde münâza‘ât-ı kesîre cereyân etmişidi. El-hâletü-hâzihi beynimize muslihûn tavassut edip da‘vâ-yı mezkûremden müvekkil-i mesfûr Yasef’i an-inkâr benimle üç yüz elli guruş üzerine sulh eylediklerinde ben dahi sulh-ı mezkûru kabûl ve bedel-i sulh-ı mezkûrun iki yüz guruşunu mukaddemâ müvekkil-i mezbûr yedinden ve yüz elli guruşunu vekîl-i mezbûr yedinden ahz u kabz eylediğimden sonra zikrolunan mehir ve eşyâya müte‘allika âmme-i de‘âvî ve mutâlebât ve eymân ve muhâsamâtdan ben müvekkil-i mezbûr Yasef ile babası vekîl-i mezbûr Harun’u ibrâ-i âmm-ı râfi‘u’l-hısâm ile ibrâ ve ıskāt eylediğimde onlar dahi ber-vech-i muharrer bana medfû‘ları olan meblağ-ı mezbûr üç yüz elli guruşa müte‘allika âmme-i de‘âvî ve mutâlebât ve muhâsâmâtdan her biri benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Zilhicce min-sene [1]143 Şuhûdü’l-hâl: Mehmed Çelebi b. Abdullah, Ahmed Haseki el-mübâşir, Mustafa Çelebi b. Hasan, Du‘âcı İbrahim b. Mustafa, Abdullah b. Mustafa, el-Hâc Hüseyin Ağa bâzergân-ı hâssa, el-Hâc Abdullah Ağa b. el-Hâc Mehmed, es-Seyyid Hasan Ağa dâmad-ı İbrahim Hânzâde, Yusuf Ağa b. Mehmed, es-Seyyid el-Hâc Mehmed, Bostânî İbrahim b. Mehmed.