Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 242 Hüküm no: 241 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Söğüt kasabasından Sâliha Hatun’un Hüsameddin mahallesi İmâmı Hüseyin Efendi’de olan alacağı için oğlunu vekil tayin ettiği Vilâyet-i Anadolu’da Söğüd kasabası mahallâtından Bâlâ mahallesinde sâkine Sâliha bt. el-Hâc Hüseyin b. Abdullah nâm hatunun sadrı kebîr oğlu ve tarafından ber-vech-i âtî vekâlet iddi‘â eden fahrü’l-eşbâh bâ‘isü hâze’l-kitâb Za‘îm Abdullah Ağa b. İbrahim meclis-i şer‘-i şerîf-i enverde mahmiye-i İstanbul’da Dülbendci Hüsameddin mahallesi imâmı Hüseyin Efendi b. Hasan mahzarında üzerine da‘vâ ve takrîr-i kelâm edip vâlidem mezbûre Sâliha Hatun’un Rıdvan Halîfe vakfından icâreteyn-i ma‘lûmeteyn ile tasarrufunda olup mahalle-i mezbûrede vâki‘ ma‘lûmü’l-hudûd ve’l-müştemilât menzil icâresinden mezbûr Hüseyin Efendi zimmetinde dört yüz seksen akçe hakkı olmağla vâlidem mezbûre meblağ-ı mezbûru imâm-ı mezkûrdan taleb ve da‘vâ ve ahz u kabz ve menzil-i mezkûr ile Kapudan İbrahim Paşa vakfından ber-vech-i muharrer tasarrufunda olup Cerrâh İshak mahallesinde vâki‘ bir tarafdan ( ) tasarrufunda olan vakf menzil ve bir tarafdan Reisülküttâb kethudâsı Ahmed Efendi bahçesi ve bir tarafdan yine mûmâ-ileyh İbrahim Paşa vakfı menzil bir tarafdan tarîk-ı âm ile mahdûd ma‘lûmü’l-müştemilât menzilini ba‘de’l-müzâyede bedel-i misli ve ma‘rifet-i mütevellîleriyle âhara ferâğa ber-mûceb-i hüccet tarafından beni kabûlüme mevkūfe vekâlet ile vekîl ve nâib-i menâb nasb ve ta‘yîn eyledikde ben dahi vekâlet-i mezbûreyi kabûl etmemle mezbûr Hüseyin Efendi’ye suâl olunup meblağ-ı mezbûru bana edâya tenbîh olunması bi’l-vekâle matlûbumdur dedikde gıbbe’s-suâl mezbûr Hüseyin Efendi cevâbında fi’l-vâki‘ mezbûre Sâliha Hatun’a menzil-i mezkûr icâresinden dört yüz seksen akçe hâlâ zimmetinde edâsı lâzım deyni olduğunu ikrâr lâkin oğlu müdde‘î-yi mezbûrun ber-vech-i muharrer vekîl olduğu ma‘lûmum değildir deyü inkâr edicek müdde‘î-yi mezbûrdan müdde‘âsını mübeyyine beyyine taleb olundukda udûl-i Müslimînden ve mârrü’z-zikr Bâlâ mahallesi ahâlîsinden zât-ı mezbûreyi ma‘rifet-i şer‘iye ile ârifân olan mezkûr Dülbendci Hüsameddin mahallesinde müsâfiren sâkin el-Hâc Hüseyin b. Abdullah ve Ahmed Beşe b. Abdülkadir nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mahalle-i mezbûrede sâkine Sâliha bt. el-Hâc Hüseyin b. Abdullah nâm hatun mahmiye-i İstanbul’da Dülbendci Hüsameddin mahallesinde vâki‘ Rıdvan Halîfe vakfından icâreteyn-i ma‘lûmeteyn ile tasarrufunda olan ma‘lûmü’l-hudûd ve’l-müştemilât menzil icâresinden mahalle-i mezbûre imâmı işbu Hüseyin Efendi zimmetinde olan dört yüz seksen akçe icâreyi taleb ve da‘vâ ve ahz u kabz ve menzil-i mezkûr ile Kapudan İbrahim Paşa vakfından ber-vech-i muharrer tasarrufunda olup Sarrâc İshak mahallesinde vâki‘ bir tarafdan ( ) tasarrufunda olan vakf menzil ve bir tarafdan Reisülküttâb kethudâsı Ahmed Efendi bahçesi ve bir tarafdan yine mûmâ-ileyh İbrahim Paşa vakfı menzil ve bir tarafdan tarîk-ı âm ile mahdûd ma‘lûmü’l-müştemilât menzil ba‘de’l-müzâyede bedel-i misilleri ve mütevellîleri ma‘rifetleriyle âhar ferâğ ve kabz-ı bedel ve bedellerini kendiye îsâle ve bunlar[ın] mütevakkıf olduğu umûrun küllîsine tarafından oğlu işbu Za‘îm Abdullah Ağa’yı bizim huzûrumuzda ber-mûceb-i hüccet kabûlüne mevkūfe vekâlet ile vekîl ve nâib-i menâb nasb ve ta‘yîn eyledikde ol dahi vekâlet-i mezbûreyi kabûl eyledi mezbûr Za‘îm Abdullah Ağa vâlidesi mezbûre Sâliha Hatun’un ber-vech-i muharrer vekîlidir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye ettikde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 16 Zilhicce sene [1]143. Şuhûdü’l-hâl: Yakub Çelebi b. Mehmed câbî-i vakf-ı mezbûr, Halil Beşe b. Sefer, İbrahim Efendi b. Mahmud, Molla Abdullah b. Abdülkadir, Mehmed Çelebi b. Abdullah.