Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 243 Hüküm no: 242 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyabat Söğütlü nâhiyesine tâbi Bahçeköy’den Fatıma’nın boşandığı kocasından mehrini taleb etmesi Vilâyet-i Anadolu’da Boyabad kazâsına tâbi‘ Söğüdlü nâhiyesinde vâki‘ Bahçeköy nâm karye sâkinelerinden Fâtıma bt. Mehmed b. Mehmed nâm hatunun babası ve tarafından zikri âtî sulh ve ibrâya bâ-hüccet vekîl-i sâbitü’l-vekâle vekîli olan mezbûr Mehmed meclis-i şer‘-i hatîr-i lâzımü’t-tevkīrde kızı müvekkile-i mezbûre Fâtıma Hatun’un sâbıkā zevci bâ‘isü hâze’l-kitâb Molla Veli b. Veli nâm kimesne mahzarında bi’l-vekâle ikrâr ve takrîr-i kelâm edip mezbûr Molla Veli kızı müvekkile-i mezbûre Fâtıma Hatun’un zevci olmağla kızı müvekkile-i mezbûreyi târih-i kitâbdan bir sene mukaddem bâyinen tatlîk etmekle ben dahi zimmetinde mütekarrir ve ma‘kūdün-aleyh olan altı bin akçe mehr-i müeccel hakkını bi’l-vekâle taleb ve da‘vâ eylediğimde beynimizde münâza‘ât-ı kesîre ve muhâsamât-ı şedîde vâki‘a olmuşidi. El-hâletü-hâzihi [beynimize] muslihûn tavassut edip da‘vâ-yı mezbûremden beni mezbûr Molla Veli ile otuz iki guruş üzerine sulh ettiklerinde ben dahi bi’l-vekâle sulh-ı mezbûru kabûl ve bedel-i sulh olan meblağ-ı mezbûr otuz iki guruşu yedinden tamamen ahz u kabz eylediğimden sonra mehr-i mezbûrun mâ‘adâsına ve târih-i kitâba gelince kızı müvekkile-i mezbûre ile beynlerinde cârî ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebât ve muhâsamâtdan her birimiz âharı bi’l-asâle ve bi’l-vekâle ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 18 min-Zilhicceti’ş-şerîfe li-sene [1]143. Şuhûdü’l-hâl: Silâhdârân ocağı kethudâsı Ahmed Ağa, Başçavuş Mustafa Ağa, Ağa halîfesi es-Seyyid İbrahim Efendi, Mustafa Efendi b. ( ), Ahmed Çavuş Ağa b. ( ), Hüseyin Çavuş b. ( ), Üsküdârî İbrahim Çavuş, Halil Sipâhi b. ( ), Mahmud Sipâhi b. ( ).