Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 244 Hüküm no: 243 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi tarafından Sarrâf Agyaz’a rehin verilen eşya için açılan davanın sulhla sonuçlandığı Sulh. Mahmiye-i İstanbul’da Molla Zeyrek mahallesinde sâkin Ahmed Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde işbu bâ‘isü’s-sifr Agyaz v. Sekyas nâm sarrâf muvâcehesinde ikrâr-ı tâm ve takrîr-i kelâm edip târih-i vesîkadan bir sene mukaddem eşyâ-i memlûkemden dokuz guruş kıymetli bir pendül sâ‘at ve on üç guruş kıymetli sîmli gaytanlı [ve] sîmli bıçak ve on bir guruş kıymetli bir sakız kuşağımı dört guruş mukābelesinde mesfûr Agyaz’a rehin vaz‘ etmekle ol dahi yedimden ahz u kabz etmeğin eşyâ-i muharrere-i memlûkem mevcûd ise aynlarını müstehlek ise ba‘de’s-sübût kıymet-i şer‘iyelerini mesfûr Agyaz’dan taleb ve da‘vâ sadedinde olduğumda beynimizde münâza‘ât-ı kesîre ve muhâsamât-ı ekîde vâki‘a olmuşidi. El-hâletü-hâzihi beynimize muslihûn tavassut edip da‘va-yı mezkûremden beni altı guruşa inşâ-i akd-i sulh eylediklerinde ol dahi sulh-ı mezkûru ba‘de’l-kabûl husûs-ı mezkûra müte‘allika âmme-i da‘vâdan mesfûr Agyaz nâm sarrâfın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 min-Zilhicceti’ş-şerîfe sene [1]143. Şuhûdü’l-hâl: Hâfız Hüseyin Efendi b. Mustafa, İmâm Ahmed Efendi b. Mustafa, Odabaşı Mehmed Beşe b. Ahmed, Berber Mustafa Çelebi b. Hüseyin, es-Seyyid Mehmed Çelebi b. Ahmed Halîfe, Mehmed Çelebi b. Abdullah tahtacı.