Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 245 Hüküm no: 244 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mustafa ile Mehmed Çelebi’nin muhâlaa yoluyla boşandıkları Muhâla‘a. Mahmiye-i İstanbul’da Kalenderhâne mahallesinde sâkine olup zâtı ma‘rifet-i şer‘iye ile ârifân Mustafa b. Abdullah ve el-Hâc Mehmed b. Hüseyin ve Hüseyin b. el-Hâc Mehmed nâm kimesneler ta‘rîfleriyle mu‘arrefe olan Rukiye bt. Mustafa nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Mehmed <> Çelebi b. Mustafa mahzarında ikrâr ve takrîr-i kelâm edip mezbûr Mehmed <> Çelebi zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh sekiz bin akçe mehr-i müeccelim ve nafaka-i iddet-i ma‘lûmem üzerlerine mezbûr Mehmed <> Çelebi’ye def‘ ve teslîm eylediğim eşyâ-i memlûkemden bir çuka ferâce ve bir çuka biniş ve sagīr ve kebîr iki yemenî ve bir çuka serpûş ve bir çuka cübbe ve bir telli entâri ve bir hatâyî şalvar ve bir hamam rahtı bedel-i hul‘ olmak üzere zevcim mezbûr Mehmed <> Çelebi ile muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyete ve eşyâ-i mezkûreye müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 Zilhicce sene [1]143. Şuhûdü’l-hâl: el-Hâc Abdurrahman b. Hasan, Hüseyin b. Hasan, İsmail b. Abdullah, el-Hâc Salih b. Süleyman, Mehmed Ağa b. Abdullah.