Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 245 Hüküm no: 245 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Efendi’nin mirası konusunda vârislerinin hisselerini aldığı Mahmiye-i İstanbul’da Ayasofya-i kebîr kurbünde sâkin iken bundan akdem vefât eden İsmail Efendi b. Ali’nin vârisi zevce-i metrûkesi Safiye bt. Sadi Efendi ile sulbî kebîr oğlu el-Hâc Ali Efendi’ye ve sulbiye kebîre kızları Fâtıma ve Âişe ve Hadîce nâm hatunlara inhisârı tahakkukundan sonra mezbûr Ali Efendi meclis-i şer‘-i şerîf-i enverde tereke-i müteveffâ-yı mezbûra bi’l-verâse vâzı‘atü’l-yed olan zevce-i mezbûre Safiye Hatun tarafından husûs-ı âti’l-beyânı tasdîka vekîl olduğu zât-ı mezbûreyi bi’l-ma‘rifeti’ş-şer‘iye ârifân İbrahim Ağa b. Mehmed ve el-Hâc Mehmed b. Ahmed nâm kimesneler şehâdetleriyle sâbit olan karındaşı râfi‘u’l-vesîka İsmail Efendi b. Sadi Efendi mahzarında ikrâr-ı tâm ve takrîr-i kelâm edip babam müteveffâ-yı merkūm İsmail Efendi’nin terekesinden zevcesi olan üveği vâlidem müvekkile-i merkūme Safiye Hatun’un yedinde olan bi’l-cümle terekesi beynimizde bi’t-terâzî takvîm olundukda hisse-i irsiye-i şer‘iyeme iki yüz elli guruş isâbet etmekle meblağ-ı mezbûrun iki yüz guruşunu nakden ve elli guruş kıymetli beynimizde ma‘lûm eşyâyı müvekkile-i mezbûre Safiye Hatun yedinden tamamen ve kâmilen ahz u kabz edip babam müteveffâ-yı mezbûrun merkūme Safiye Hatun yedinde olan terekesinde hakkımı istifâ eyledim. Min-ba‘d babam müteveffâ-yı mezbûrun kalîl ü kesîr ve celîl ü hakīr terekesine müte‘allika müvekkile-i merkūme Safiye Hatun ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetimiz olmayıp âmme-i da‘vâdan zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l vâki‘ bi’t-taleb ketb olundu. Fî 18 min-Zilhicce sene [1]143. Şuhûdü’l-hâl: İbrahim Ağa b. Mehmed, el-Hâc Mehmed b. Ahmed, Mustafa b. Hüseyin, Osman Beşe b. İbrahim, el-Hâc Ahmed b. el-Hâc Tayyib, Mustafa Efendi b. Abdullah, el-Hâc Yusuf b. Abdullah, Mustafa Beşe b. Abdullah.