Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 246 Hüküm no: 246 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm ile Ömer b. Hüseyin’in muhâlaa yoluyla boşandıkları Muhâla‘a. Mahmiye-i İstanbul’da Yedikule kurbünde el-Hâc Pîrî mahallesi sâkinelerinden olup zâtı Molla Mustafa b. el-Hâc Ali ve el-Hâc Ahmed b. el-Hâc İsmail ta‘rîfleriyle mu‘arrefe olan Ümmügülsüm bt. Osman nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb Ömer b. Hüseyin mahzarında ikrâr ve takrîr-i kelâm edip mezbûr Ömer bundan akdem zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh altı bin akçe mehr-i müeccelim ve nafaka-i iddet-i ma‘lûmem üzerlerine ve kendiye def‘ ve teslîm eylediğim yirmi iki guruş bedel-i hul‘ olup me’ûnet-i süknâm dahi kendi üzerime olmak üzere zevcim mezbûr Ömer ile muhâla‘a-i sahîha-i şer‘iye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve mutâlebât ve muhâsamâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 19 Zilhicce sene [1]143. Şuhûdü’l-hâl: İbrahim Çavuş b. Mehmed el-mübâşir, el-Hâc Ahmed b. el-Hâc İsmail, el-Hâc Mehmed b. el-Hâc İbrahim, Molla Mustafa b. el-Hâc Ali, Mehmed Çelebi b. Abdullah, Molla İbrahim b. Mustafa, Yakub b. Abdullah, Ahmed b. Hasan, Abdullah b. Mustafa.