Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 67 Hüküm no: 60 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlu olarak vefat eden Süleyman Ağa’nın terekesinin satılıp borçlarının ödenmesi Medîne-i Üsküdar’a muzâfe Adalar nâhiyesine tâbi‘ Kartal kasabasında sâkin iken bundan akdem düyûnu terekesinden ezyed olduğu hâlde fevt olan Süleyman Ağa b. Ahmed’in verâseti zevce-i menkûha-i metrûkesi Âişe bt. el-Hâc Mustafa Ağa nâm hatun ile sulbî sagīr oğlu Süleyman ve sagīre kızı Selime’ye münhasıra ba‘dehû sagīr-i mezbûr Süleyman fevt olup verâseti anası mezbûre hatun ile ve li-ebeveyn kız karındaşı mezbûre Selime’ye ve li-üm er karındaşı es-Seyyid Mehmed Sadık b. es-Seyyid İbrahim nâm kimesneye münhasıra oldukdan sonra zevce-i mezbûre kendü nefsinden asıl ve sagīre-i mezbûre Selime tarafından bâ-hüccet-i şer‘iye Âişe Hatun tarafından ber-vech-i âtî ikrâra ve i‘tâ-i hüccete vekîl olduğu zât-ı mezbûreyi ârifân el-Hâc Mahmud Ağa b. Ali ve el-Hâc Mehmed b. el-Hâc Mehmed ve Kara Ahmed b. Mehmed şehâdetleriyle vekâleti sâbit olan mezbûr es-Seyyid Mehmed Sadık vekâleten ve kendü nefsinden dahi asâleten meclis-i şer‘-i hatîr-i lâzimü’t-tevkīrde işbu bâ‘isü’l-vesîka Nalıncızâde Molla Hasan b. Ali mahzarında ikrâr ve takrîr-i kelâm edüp ber-mûceb-i defter-i kassâm ba‘de’t-tahrîr ve’t-taksîm müteveffâ-yı evvel-i mezbûrdan bize ırsen intikāl eden Maldepe dağında vâki‘ bir tarafı Avanisoğulları bağı ve bir tarafı Kalfaoğlu Aci Baron bağı ve iki tarafı tarîk-i âm ile mahdûd dokuz bin iki yüz doksan beş çubuk çavuş ve sekiz bin iki yüz otuz sekiz çubuk dut ve mahlût vişne eşcârlı bir kıt‘a bağı münâdî lisânıyla müzâyede ve rağabât-ı nâs bi’l-külliye munkatı‘a olup mezbûr Molla Hasan üzerinde on ikişer akçeye çavuş çubuğunun beheri ve onar akçeye dut çubuğunun beheri cem‘an bir yük doksan üç bin dokuz yüz yirmi akçede karâr ve ziyâde ile tâlib-i âharı zuhûr etmeyüp ve bağ-ı mahdûd-ı mezkûrun vişne eşcârıyla el-yevm ber-vech-i muharrer semen-i misli olduğunu sikāt-ı sahîhatü’l-kelimât kimesneler ihbârlarıyla inde’ş-şer‘i’l-enver zâhir oldukdan sonra bağ-ı mahdûd-ı mezkûru semen-i misli ile müteveffâ-yı evvel-i mezbûrun düyûn-ı müsbetesi’çün edâya kıbel-i şer‘den mezûn olduğumuza binâen müşterî-i mezbûr Molla Hasan’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile her birimiz asâleten ve vesâyeten bey‘ u teslîm ve temlîk eylediğimizde ol dahi ber-vech-i muharrer iştirâ ve tesellüm ve temellük ve kabz u kabûl edüp semen-i misli olan meblağ-ı mezkûr bir yük doksan üç bin dokuz yüz yirmi akçeyi müşterî-i mezbûr Molla Hasan yedinden her birimiz asâleten ve vesâyeten tamâmen ahz ü kabz eyleyüp fîmâ-ba‘d bağ-ı mahdûd-ı mezkûrda vechen mine’l-vücûh kat‘â ve kātıbeten bizim asâleten ve vesâyeten alâka ve medhalimiz kalmayup müşterî-i mezbûr Molla Hasan b. Ali’nin mülk-i müşterâsı ve hakk-ı sırf-ı mahzı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min-Recebi’l-ferd li-sene tis‘a ve seb‘în ve mi’ete ve elf. Şuhûdü’l-hâl: Hüseyin Ağa, Ahmed Ağa, Kayseriyeli Mehmed Ağa, İbrahim Odabaşı, Hüseyin Usta b. Ahmed, Nalband İbrahim Beşe, Helvacı İbrahim Beşe, Duhânî Mehmed Beşe, Karamânî Molla Ahmed, Arabacızâde Molla Mustafa, el-Hâc Hasan Ağa, Nalband Veli Beşe, Ahmed Efendi.