Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 291 Hüküm no: 417 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habib Efendi’nin cariyesini eşine hibe ettiği Mahmiye-i İstanbul’da Salih Paşa Mahallesi’nde sâkin umdetü’l-kuzât Habib Efendi b. Fethi mahfil-i kazâda hâlen zevce-i menkûhası olan fahrü’l-muhadderât Emine bt. Üveys tarafından tasdîk-i âti’z-zikre vekîli olup hasm-ı câhid-i şer‘î mahzarında nehc-i mu‘teber-i mer‘î üzere vekâleti sâbite olan dâmâdı Abdülbâki Efendi b. Yusuf mahzarında ikrâr-ı tâm ve bast-ı merâm kılıp silk-i mülkümde olan açık kaşlı, kara gözlü, uzun boylu, Rusiyyetü’l-asl Gülistan bt. Abdullah nâm câriye-i memlûkemi zevcem mezbûre Emine’ye hibe ve temlîk ve teslîm eyleyip ol dahi temellük ve tesellüm ve kabz ve kabûl eyleyip ba‘de’l-yevm mezbûre Gülistan zevcem Emine’nin mülk-i mevhûbu olup kat‘an benim medhalim ve alâkam kalmamışdır, hasbe-mâ türîd ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: Mustafa Efendi el-kādı, Abdulkādir Çelebi el-imâm, Ali Çelebi b. Mustafa, Yusuf Beşe er-râcil, Hasan Çelebi b. Sami, İmâmzâde Şeyh Mehmed Çelebi b. Musa Efendi, Ali Efendi b. Mehmed Efendi.