Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 292 Hüküm no: 418 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin ev arsasını ve tarlasını sattığı Vilâyet-i Anadolu’da Safranbolu kazâsına tâbi‘ Ketan karyesi ahâlîsinden Ahmed Beşe b. Ali mahfil-i kazâda işbu râfi‘u’l-kitâb Ömer b. Hacı Bayram mahzarında ikrâr-ı tâm ve takrîr-i kelâm edip karye-i mezbûrede vâki‘ sâkin olduğum ev ardında samanlık kurbünde tûlen ve arzan otuzar zirâ‘ harâbe müşrif mülk menzil yerini bâtten ve karye-i mezbûre sınırında vâki‘ bir tarafı Köse Halil tarlası ve bir tarafı Murad Ali tarlası ve bir tarafı Abdülmümin tarlası ve bir tarafı Mazı köyünden gelen yol ile mahdûd olan bir kıt‘a tarlamın dahi hakk-ı tasarrufunu sâhib-i arz ma‘rifetiyle iki bin nakd râyic fi’l-vakt fıddî akçeye bi-safkatin vâhidetin bey‘ ve tefvîz edip ol dahi iştirâ ve tefevvüz eyledikden sonra meblağ-ı mezbûr iki bin akçeyi yedinden bi’t-tamam ve’l-kemâl ahz u kabz edip mebî‘-i mezbûru ve mezra‘a-i merkūmeyi mahallinde kabz ve tesellüm ve zabt ve tasarrufa merkūm Ömer’i taslît eyledim, zikrolunan menzil yerinde ve mezra‘ada benim alâka ve medhalim kalmadı dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâbi‘ ve’l-ışrîn min-Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: İsmail b. Ali, Ali b. İsmail, el-Hâc Mehmed b. el-Hâc Pîrî, Hasan b. Mütevekkil?, Ahmed Çelebi b. Mustafa ve gayruhum.