Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 247 Hüküm no: 248 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Yani v. Panayot’un mirasının vârisleri arasında taksimi Mahmiye-i İstanbul’da Cibali Kapısı hâricinde Seferikoz mahallesi ahâlîsinden iken bundan akdem hâlik olan Yani v. Panayot nâm zimmînin verâset-i sulbî kebîr oğulları Yorgi ve Foti ve Pertinos nâm zimmîler ile kebîre kızı Vasilaki nâm Nasrâniyeye inhisârı tahakkukundan sonra mezbûrûn Yorgi ve Foti asâleten ve mezbûre Vasilaki Nasrâniyenin oğlu olup tarafından ikrâr-ı âti’z-zikre vekîl olduğu zât-ı mezbûreyi bi’l-ma‘rifeti’ş-şer‘iye ârifân Mahmud Beşe b. Mehmed ve Hüseyin Çelebi b. Davud şehâdetleriyle sâbit olan Kostantin v. Yani nâm zimmî vekâleten meclis-i şer‘-i şerîf-i enverde râfi‘u’s-sifr karındaşları merkūm Pertinos zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip babamız hâlik-i merkūm hayatında yedinde mülk ve hakkı olup mahalle-i mezbûrede vâki‘ bir tarafdan Rûznâmçe Halîfesi İbrahim Efendi mülkü ve bir tarafdan Yahûdihâne ve bir tarafdan sâhil-i bahr ve bir tarafdan tarîk-ı âm ile mahdûd ve deryâ tarafında fevkānî iki bâb oda ve bir camlı sofa ve tahtânî iki oda ve bir sofa ve tarîk-ı âm tarafında iki oda ve bir camlı sofa ve matbah ve bi’r-i mâyı müştemil mülk menzilin nısf-ı şâyi‘ini oğlu Yorgi’ye semen-i ma‘lûm ve makbûza bey‘ ve temlîk ve nısf-ı âharını dahi tevâbi‘ ve levâhıkı ile üç bin guruşa ale’l-iştirâki’s-seviy mezbûrân Panayot ve Foti ile kendinden mukaddem hâlik olan Anaştas zimmî ba‘de’l-bey‘ ve’t-temlîk merkūm Anaştaş babam hâlik-i merkūmdan mukaddem hâlik olmağla menzil-i mahdûd-ı mezbûrun altı sehim i‘tibârıyla bir sehmi yine ırsen kendiye isâbet ve intikāl eyledikden sonra yedinde mülk ve hakkı olduğu hâlde hâlik-i olup verese-i merkūmûna mevrûs olmağla menzil-i mezbûrdan ber-vech-i muharrer bir sehim hisse-i merkūme ba‘de’t-takvîm sâir tereke beynimizde bi’t-terâzî iktisâm eylediğimizde menzil-i mahdûd-ı mezbûrdan altı sehim i‘tibârıyla babamız hâlik-i merkūma isâbet eden hissenin rub‘u merkūm Pertinos zimmînin hissesine ta‘yîn ve tahsîs eylediğimizde ol dahi kabz ve kabûl etmekle sâlifü’l-beyân altı sehim i‘tibârıyla bir sehim menzilin rub‘u merkūm Pertinos zimmînin mülk ve hakkı olup bizim kat‘a alâka ve medhalimiz yokdur dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 21 Zilhicce sene [1]143 Şuhûdü’l-hâl: Mehmed Beşe b. Mahmud, Hasan Çelebi b. Davud, es-Seyyid Ahmed Çelebi b. es-Seyyid İsmail, Mustafa Çelebi b. Osman, Salih Çelebi b. Süleyman, Mehmed Ağa b. Mehmed, Ahmed b. Şa‘ban, Panayot v. Simaven, Papa Yorgi v. İsteryo, Papa Kostantin v. Sava, Niko v. Papa İsteryo, Yanaki v. Panayot, Aleksan v. Yani, Anaştaş v. Mari.