Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 248 Hüküm no: 249 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Yani v. Panayot’un mirasının vârisleri arasında taksimi Mahmiye-i İstanbul’da Cibali Kapısı hâricinde Seferikoz mahallesi ahâlîsinden iken bundan akdem hâlik olan Yani v. Panayot nâm zimmînin verâseti sulbî kebîr oğulları Yorgi ve Foti ve Pertinos ile kebîre kızı Vasilaki nâm Nasrâniyeye inhisârı tahakkukundan sonra merkūmân Foti ve Pertinos asâleten ve merkūm[e] Vasilaki Nasrâniye tarafından ibrâ-i âti’z-zikri ikrâra vekîl olduğu zât-ı merkūmeyi bi’l-ma‘rifeti’ş-şer‘iye ârifân Mahmud Beşe b. Mehmed ve Hasan Çelebi b. Davud şehâdetleriyle sâbit olan kebîr oğlu Kostantin v. Yani nâm zimmî vekâleten meclis-i şer‘-i şerîf-i enverde tereke-i hâlik-i merkūma bi’l-verâse vâzı‘u’l-yed olan kebîr râfi‘u’s-sifr merkūm Yorgi muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip babamız hâlik-i merkūm Yani zimmî ile kendiden mukaddem hâlik olan vâlidemiz Mayora bt. Yani Nasrâniyenin bi’l-cümle esâs-ı beyt ve evânî-i nühâs ve melbûsât ve mefrûşât terekeleri beynimizde bi’t-terâzî takvîm olundukda her birimiz hissemize isâbet eden eşyâ-yı karındaşımız merkūm Yorgi yedinden tamamen ahz u kabz edip babamız hâlik-i merkūm Yani ile vâlidemiz Maryora Nasrâniyenin terekesinden hakkımızı tamamen istifâ eyledik ba‘de’l-yevm husûs-ı mirasa müte‘allika her birimizin âhar ile da‘vâ ve nizâ‘ ve husûmetimiz kalmayıp her birimizin âharın zimmetini ibrâ ve ıskāt eyledik dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 21 Zilhicce sene [1]143 Şuhûdü’l-hâl: eş-Şâhidûnü’ş-şâhidûn [eş-Şâhidûnü’s-sâbıkūn].