Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 249 Hüküm no: 250 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Yani v. Panayot’un mirasının vârisleri arasında taksimi Mahmiye-i İstanbul’da Cibali Kapısı hâricinde Seferikoz mahallesi ahâlîsinden iken bundan akdem hâlik olan Yani v. Panayot nâm zimmînin verâseti sulbî kebîr oğlu Yorgi ve Foti ve Pertinos ile kebîre kızı Vasilaki nâm Nasrâniyeye inhisârı tahakkukundan sonra mezbûrân Yorgi ve Pertinos ve Foti nâm zimmîler meclis-i şer‘-i şerîf-i enverde kız karındaşları râfi‘atü’l-vesîka Vasilaki Nasrâniye tarafından ber-vech-i âtî tasdîka vekîl olduğu şahs-ı mezbûreyi bi’l-ma‘rifeti’ş-şer‘iye ârifân Mahmud Beşe b. Mehmed ve Hüseyin Çelebi b. Davud nâm kimesneler şehâdetleriyle şer‘an sâbit olan oğlu Kostantin v. Yani nâm zimmî muvâcehesinde her biri ikrâr ve takrîr-i kelâm edip babamız hâlik-i merkūm hayatında yedinde mülk ve hakkı olup mahalle-i mezbûrede vâki‘ bir tarafdan Rûznâmçe Halîfesi İbrahim Efendi mülkü ve bir tarafdan Yahûdihâne ve bir tarafdan deryâ ve bir tarafdan tarîk-ı âm ile mahdûd deryâ tarafında iki bâb oda ve bir camlı sofa ve tahtânî iki oda ve bir sofa ve tarîk-ı âm tarafında fevkānî iki oda ve bir camlı sofa ve matbah ve bi’r-i mâyı müştemil mülk menzilin nısf-ı şâyi‘ini karındaşımız mezbûr Yorgi’ye semen-i ma‘lûm ve makbûza bey‘ ve temlîk ve nısf-ı âharını dahi oğlu olup kendinden mukaddem hâlik olan karındaşımız Anaştaş zimmî ile bize üç bin guruş semen-i medfû‘ ve makbûza bey‘ ve temlîk ve teslîm ettikden sonra mezbûr Anaştaş hâlik oldukda altı sehim i‘tibârıyla bir sehim hissesi kendiye ırsen intikāl etmişidi. El-hâletü-hâzihi babamız hâlik-i merkūmun sâir terekesiyle hisse-i merkūme beynimizde bi’t-terâzî takvîm olunup hisse-i merkūmenin rub‘u kız karındaşı müvekkile-i mezbûre Vasilaki Nasrâniyenin hissesine ta‘yîn ve tahsîs olundukda ol dahi kabz ve kabûl etmekle mecmû‘-ı menzil-i mahdûd-ı mezkûrun altı sehim i‘tibârıyla bir sehminin rub‘u müvekkile-i merkūme Vasilaki Nasrâniyenin mülk ve hakkı olup kat‘a alâka ve medhalimiz kalmadı. Keyfe mâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 21 min-Zilhicce sene [1]143 Şuhûdü’l-hâl: eş-Şâhidûnü’s-sâbıkūn.