Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 249 Hüküm no: 251 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Yani v. Panayot’un mirasının vârisleri arasında taksimi Mahmiye-i İstanbul’da Cibali Kapısı hâricinde Seferikoz mahallesi ahâlîsinden iken bundan akdem hâlik olan Yani v. Panayot nâm zimmînin verâseti sulbî kebîr oğulları Yorgi ve Foti ve Pertinos nâm zimmîler ile sulbiye kebîre kızı Vasilaki nâm Nasrâniyeye inhisârı tahakkukundan sonra mezbûrân Yorgi ve Pertinos asâleten ve merkūme Vasilaki Nasrâniye tarafından ber-vech-i âtî ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân Mahmud Beşe b. Mehmed ve Hüseyin Çelebi b. Davud nâm kimesneler şehâdetleriyle şer‘an sâbit olan oğlu Kostantin v. Yani nâm zimmî vekâleten meclis-i şer‘-i şerîf-i enverde karındaşları mezbûr Foti muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip babamız hâlik-i merkūm hayatında yedinde mülk ve hakkı olup mahalle-i mezbûrede vâki‘ bir tarafdan Rûznâmçe Halîfesi İbrahim Efendi mülkü ve bir tarafdan Yahûdihâne ve bir tarafdan sâhil-i bahr ve bir tarafdan tarîk-ı âm ile mahdûd deryâ tarafında fevkānî iki oda ve bir camlı sofa ve tahtânî iki oda ve bir sofa ve tarîk-ı âm tarafında fevkānî iki oda ve bir camlı sofa ve matbah ve bi’r-i mâyı müştemil mülk menzilin nısf-ı şâyi‘ini karındaşımız mezbûr Yorgi’ye yedinde olan hüccet mantûkunca semen-i ma‘lûm ve makbûza bey‘ ve temlîk ve nısf-ı âhar şâyi‘ini dahi oğlu karındaşımız Anaştaş zimmî ile bize üç bin guruş semen-i medfû‘ ve makbûza bey‘ ve temlîk ve teslîm eyledikden sonra mezbûr Anaştaş hâlik oldukda altı sehimi i‘tibârıyla bir sehim hissesi kendiye ırsen intikāl eylemiş idi. El-hâletü-hâzihi babamız hâlik-i merkūmun sâir terekesiyle hisse-i merkūme beynimizde bi’t-terâzî takvîm ve taksîm olunup hisse-i merkūmenin rub‘u karındaşımız merkūm Foti zimmînin hissesine ta‘yîn ve tahsîs olundukda ol dahi kabz ve kabûl etmekle mecmû‘-ı menzil-i mahdûd-ı mezkûrun altı sehim i‘tibârıyla bir sehminin rub‘u merkūm Foti’nin mülk ve hakkı olup bizim kat‘a hisse-i merkūmede alâka ve medhalimiz yokdur dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 21 Zilhicce sene [1]143 Şuhûdü’l-hâl: eş-Şâhidûnü’s-sâbıkūn.