Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 250 Hüküm no: 252 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferikoz mahallesinden Yani v. Panayot’un mirasının vârisleri arasında taksimi Mahmiye-i İstanbul’da Cibali Kapısı hâricinde Seferikoz mahallesi ahâlîsinden iken bundan akdem hâlik olan Yani v. Panayot nâm zimmînin verâseti sulbî kebîr oğulları Yorgi ve Foti ve Pertinos nâm zimmîler ile kebîre kızı Vasilaki nâm Nasrâniyeye inhisârı tahakkukundan sonra mezbûrûn Yorgi ve Pertinos asâleten ve kız karındaşları merkūme Vasilaki Nasrâniye tarafından ber-vech-i âtî ikrâra vekîl olduğu şahs-ı mezbûreyi bi’l-ma‘rifeti’ş-şer‘iye ârifân Mahmud Beşe b. Mehmed ve Hasan Çelebi b. Davud nâm kimesneler şehâdetleriyle şer‘an sâbit olan oğlu Kostantin v. Yani zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm edip babam hâlik-i merkūm hayatında yedinde mülk ve hakkı olup mahalle-i mezbûrede vâki‘ bir Rûznâmçe Halîfesi İbrahim Efendi mülkü ve bir tarafdan Yahûdihâne ve bir tarafdan sâhil-i bahr ve bir tarafdan [62a] tarîk-ı âm ile mahdûd deryâ tarafında fevkānî iki bâb oda ve bir camlı sofa ve tahtânî iki oda ve bir sofa ve tarîk-ı âm <> tarafında fevkānî iki oda ve bir camlı sofa ve matbah ve bi’r-i mâyı müştemil mülk menzilinin nısf-ı şâyi‘ini cümle tevâbi‘ ve levâhıkı ile karındaşı mezbûr Yorgi zimmîye semen-i ma‘lûm ve makbûza bey‘ ve teslîm ve nısf-ı şâyi‘ini dahi karındaşımız olup kendiden mukaddem hâlik olan Anaştaş zimmî ile bize üç bin [guruş] semen-i medfû‘ ve makbûza bey‘ ve teslîm eyledikden sonra menzil-i mezbûrun altı sehim i‘tibârıyla üç sehmi karındaşımız merkūm Yorgi’nin mülk-i müşterâsı ve üç sehimden dahi birer sehmi bizim mülk ve hakkımız oldukdan sonra karındaşımız merkūm Anaştaş hâlik oldukda bir sehim hissesi yine babamız merkūm Yani zimmîye isâbet ve intikāl etmişidi. Babamız mezbûr zimmî ba‘de’l-helâk hisse-i merkūmesi sâir terekesiyle verese-i merkūmesine intikāl eyledikde biz dahi beynimizde bi’t-terâzî takvîm ve taksîm edip menzil-i mezbûrun altı sehim i‘tibârıyla bir sehminin rub‘u karındaşımız mezbûr Yorgi’nin ve birer sehmi bizim ve bir sehmi dahi kız karındaşımız Vasilaki Nasrâniyenin hisselerine isâbet ve intikāl etmekle menzil-i mahdûd-ı mezbûrun altı sehim i‘tibârıyla üç sehmi şirâen ve bir sehmin dahi dört sehim i‘tibârıyla rub‘u karındaşımız mezbûr Yorgi zimmînin mülk ve hakkıdır. Keyfe mâ yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 21 min-Zilhicce sene [1]143 Şuhûdü’l-hâl: eş-Şâhidûnü’s-sâbıkūn.