Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 251 Hüküm no: 253 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çadırcıahmed mahallesinde Mahmud Efendi’nin tasarrufunda olan evin Yusuf Ağa’ya satıldığı Mübâya‘a. Mahmiye-i İstanbul’da Kumkapı kurbünde Çadırcı Ahmed mahallesinde sâkin Mahmud Efendi b. Hüseyin nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb fahrü’l-eşbâh Yusuf Ağa b. Mehmed mahzarında ikrâr-ı tâm ve takrîr-i kelâm edip arsasının merhûm Bali Paşa vakfına senede yüz on akçe mukāta‘a-i kadîmesi ve üzerinde olan ebniyesi akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Arpacı Hasan mülkü ve bir tarafdan İpekçi vakfı menzil ve bir tarafdan Bali Paşa vakfı ve bir tarafdan tarîk-ı âm ile mahdûd fevkānî bir oda ve tahtânî bir oda ve matbah ve kenîf ve havluyu müştemil mülk menzilin ebniye-i memlûkesini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-ı bâtt-ı sahîh-i şer‘î ile altı yüz seksen guruşa merkūm Yusuf Ağa bey‘ ve temlîk ve teslîm ve arsasını dahi bâ-ma‘rifet-i mütevellî-yi vakf-ı mezbûr meccânen ferâğ ve tefvîz ol dahi ber-vech-i muharrer iştirâ ve temellük ve tesellüm eylediğinden sonra semen-i merkūm altı yüz seksen guruşu müşteri-yi mezbûr Yusuf Ağa yedinden tamamen ahz u kabz eyledim fîmâ-ba‘d menzil-i mahdûd-ı mezkûrun ebniye-i memlûkesi merkūm Yusuf Ağa’nın mülk-i müşterâsı ve arsası dâhil-i havza-i tasarrufu olup kat‘a benim alâka ve medhalim kalmamışdır. Keyfe mâ yeşâ ve yahtâr mutassarıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 22 min-Zilhicce sene [1]143 Şuhûdü’l-hâl: Yusuf Ağa b. Abdullah, Himmet Çelebi b. Mustafa, İbrahim b. Ahmed, Mustafa Efendi b. Kemâl, Mustafa Efendi b. Ahmed, İbrahim Efendi el-imâm, Molla Hasan b. Muslihiddin çukadâr, Ali Çavuş an-zümre-i silâhdârân, Osman Çelebi çukadâr.