Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 252 Hüküm no: 254 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Kula kadısı Ali Efendi’nin kölesinin nikâhlandığı eşinden bâyinen boşandığı Vilâyet-i Anadolu’da Bolu Sancağı’nda Yenice-i Eflani kazâsına tâbi‘ Sâdık nâm karye ahâlîsinden olup mahmiye-i İstanbul’da müsâfiren sâkin sâbıkā Kula kādısı umdetü’l-kuzât Ali Efendi b. Mustafa nâm kimesnenin hâlâ abd-i memlûkü Acemiyyü’l-asl Müslimü’l-mille Ali b. İbrahim nâm gulâm meclis-i şer‘-i hatîr-i lâzımü’t-tevkīrde yine karye-i mezbûrede sâkine zevce-i gayr-ı medhûlün-bihâsı Sâliha bt. İsmail b. İsa nâm bikr-i bâliğanın li-ebeveyn er karındaşı ve tarafından husûs-ı âti’z-zikre vekîl-i müsbeti olan bâ‘isü hâze’l-kitâb Mustafa Bey b. el-mezbûr İsmail b. İsa tarafından dahi husûs-ı âti’z-zikri tasdîka vekîl olduğu Mehmed Bey b. Ali ve Hüseyin Bey b. Ali şehâdetleriyle sâbit olan Ahmed Bey b. Mustafa nâm kimesne mahzarında mâliki mûmâ-ileyh Ali Efendi hazır olduğu hâlde ikrâr-ı tâm ve takrîr-i kelâm edip karye-i mezbûrede sâkine mezbûre Sâliha’yı bundan akdem velî-yi mücbiri olan babası mezbûr İsmail mâlikim mûmâ-ileyh Ali Efendi’nin izin ve ma‘rifeti ile bin sekiz yüz akçe mehr-i müeccel tesmiyesiyle bana bi’l-velâye inkâh ve tezvîc eyledikde ben dahi ber-vech-i muharrer tezevvüc ve kabûl etmişidim. Hâlâ mezbûre Sâliha’yı bâyinen tatlîk edip kable’d-duhûl lâzım gelen nısf-ı mehr-i müecceli olan dokuz yüz akçeyi karındaşı müvekkil-i merkūma def‘ ve teslîm eylediğimde ol dahi kız karındaşı müvekkile-i mezbûre için yedimden ba‘de’l-ahz ve’l-kabz müvekkil-i mezbûr Mustafa Bey teberrü‘an mâlından bana elli yedi buçuk guruş def‘ ve teslîm ben dahi yedinden tamamen ahz u kabz eylediğimden sonra hukūk-ı zevciyete vesâire [62b] ve meblağ-ı mezbûr elli yedi buçuk guruşa müte‘allika âmme-i de‘âvî ve kâffe-i mutâlebât ve muhâsamâtdan beni ve mâlikim mûmâ-ileyh Ali Efendi’yi ibrâ ve ıskāt eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 24 min-Zilhicceti’ş-şerîfe sene [1]143 Şuhûdü’l-hâl: Hasan b. Mahmud, Mehmed Bey b. Mustafa, Mübâşir Hasan Bey b. Ali, Mehmed Bey b. Ali, Mehmed Ağa b. Halil, Süleyman Efendi b. Abdünnebi.