Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 292 Hüküm no: 419 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da vefât eden Ahmed b. Said’in mallarını elinde bulunduran el-Hâc Ali Bey’in bunları Cerbe adasındaki vârislerine ulaştırmak üzere vekillerine verdiği Diyâr-ı Mağrib’de cezîre-i Cerbe ahâlîsinden olup mahmiye-i İstanbul’da ticâret üzere iken bundan akdem vefât eden merhûm Ahmed b. Said b. Gırbal el-Cermî nâm tâcirin verâseti karye-i mezbûrede sâkinân olan zevce-i metrûkeleri Hadice bt. Mehmed el-Mergubî ve Tilalgır? bt. Bağrir? b. Merzuk er-Rekdasî nâm hatunlara ve sulbî kebîr oğlu Süleyman ve sulbiye kebîre kızı Lü’lü’ye ve sulbî sagīr oğlu Said ve sulbiye sagīre kızları Mesude ve Babasna’ya münhasır olup mezbûre Tilalgır sıgār-ı mezkûrînin tesviye-i umûrlarına kıbel-i şer‘den mansûbe vasîleri olduğu mezbûre Hadice ve merkūmân Süleyman ve Lü’lü’ ve sıgār-ı mezkûrînin vasîleri olan mezbûre Tilalgır taraflarından müteveffâ-i mezbûrun muhallefâtını mahmiye-i İstanbul vesâir bilâdda vâzı‘u’l-yed olanlardan da‘vâ ve talebe ve ahz u kabz ve kendülere îsâle ve lede’l-hükkâmi’l-kirâm ...? ve îsâle mutavakkıf olan umûra ve ibrâya Ömer b. Şa‘ban b. Ali el-Harbî el-Merkedaşî? nâm kimesnenin vekâlet-i mutlaka ile vekîl olduğu hâlâ cezîre-i mezbûrede hilâfet-i mütevellî olan Ebu’l-Hasan Ali b. el-Fakih Abdülhak el-Mennî kıbelinden vârid olup târîh-i kitâb senesi Rebî‘ülâhirinin evâhiri ile müverraha mazmûn-ı bi-men şuhûdü’t-tarîk isimleri mastûr olan Ebu İsa b. Ahmed Reis b. Ömer el-Mayinî ve Ebu’l-Fazl b. Mehmed Ahrab? şehâdetleri ile hasm-ı münkir mahzarında müsbit olan nakl-i sahîh-i şer‘î ile şer‘an sâbite oldukdan sonra merkūm Ömer mahfil-i kazâda müteveffâ-i mezbûrun mahmiye-i merkūmede muhallefâtına vâzı‘u’l-yed olan işbu bâ‘isü’l-kitâb el-Hâc Ali b. Mehmed b. İsa mahzarında ikrâr-ı tâm ve takrîr-i kelâm edip mezbûr el-Hâc Ali Bey müteveffâ-i mezbûrun muhallefâtından Gürciyyetü’l-asl câriye bahâsından ve adedi ve cinsi ve mikdârı beynimizde ilm-i şer‘î ile ma‘lûm olan peştemâl ve ..? zencebil bahâsından ve yine beynimizde ma‘lûm sâir eşyâ bahâsından emâneten yedinde mazbût olan dört yüz on iki kıt‘a riyâlî guruşu mezbûr el-Hâc Ali’nin yedinden bi’t-tamam ve’l-kemâl vekâletim hasebiyle ahz u kabz edip müteveffâ-i mezbûrun muhallefâtına müte‘allık da‘vâ ve mutâlebe ve eymân ve muhâsamadan zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, meblağ-ı mezbûrdan vesâir muhallefâtından mezbûr el-Hâc Ali yedinde ism-i mâl ıtlâk olunur bir şey bâkī kalmadı, ba‘de’l-yevm bir tarîk ile müteveffâ-i mezbûrun muhallefâtına müte‘allık mezbûr el-Hâc Ali’den da‘vâ edersem lede’l-hükkâmi’l-kirâm istimâ‘ olunmaya dedikde gıbbe’t-tasdîk bi’t-taleb mâ-vaka‘a ketb olundu. Fî selhi Şa‘bani’l-mu‘azzam li-sene erba‘a ve sittin ve elf. Şuhûdü’l-hâl: el-Hâc Yusuf b. el-Hâc Said el-Harar, Yusuf b. el-Hâc Said el-Cilbabî, Mehmed b. Ali Belik?, el-Hâc Said b. Sa‘lâs?, es-Seyyid Ahmed Çelebi [b.] es-Seyyid Hâmid?, el-Hâc Abdurrahman Selak?, el-Hâc İsa b. Abdülmümin, Mehmed b. ...?, Ahmed b. el-Hâc Said el-Cibal, el-Hâc Ramazan b. Mehmed, Mehmed b. Said ...? ve gayruhum.