Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 255 Hüküm no: 256 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe’nin İbradı kasabasınki bağını sattığı Mübâya‘a-i bağ. Vilâyet-i Anadolu’da Alâiye Sancağı’nda İbradı kasabası ahâlîsinden olup hâlâ mahmiye-i İstanbul’da Dergâh-ı âlî cebecilerinden üçüncü bölük neferâtından Mehmed Beşe b. Ali nâm kimesne meclis-i şer‘-i şerîf-i enverde bâ‘isü’l-kitâb es-Seyyid Mustafa b. es-Seyyid Ali nâm kimesne mahzarında ikrâr ve takrîr-i kelâm edip yedimde mülk ve hakkım olup kasaba-i mezbûre hudûdu dâhilinde Katranbucağı demekle ma‘rûf mahâlde vâki‘ bir tarafdan Ebûbekir oğlu es-Seyyid el-Hâc Ali mezrâ‘ası ve bir tarafdan Şeyh Mehmed Efendi mezrâ‘ası ve bir tarafdan el-Hâc İbrahim mezrâ‘ası ve taraf-ı râbi‘i tarîk-ı âm ile mahdûd ve tahmînen üç dönüm kürûmu ve eşcâr-ı müsmire ve gayr-ı müsmireyi muhtevî bağımı bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile altı yüz guruşa mezbûr es-Seyyid Mustafa’ya bey‘ ve temlîk ve mahâllinde kabz ve tesellüme taslît eylediğimde ol dahi minvâl-i muharrer üzere iştirâ ve temellük ve kabûl eylediğinden sonra semeni olan meblağ-ı mezbûr altı yüz guruşu mezbûr es-Seyyid Mustafa yedinden tamamen ahz u ve kabz eyledim. Ba‘de’l-yevm zikrolunan bağda alâka ve medhalim kalmayıp mezbûr es-Seyyid Mustafa’nın mülk-i müşterâsı olmuşdur. Keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 26 Zilhicce sene [1]143. Şuhûdü’l-hâl: es-Seyyid İsmail Ağa b. es-Seyyid Ali, es-Seyyid Mehmed Çelebi b. Osman, es-Seyyid Mehmed Çelebi b. İsmail, es-Seyyid Osman Çelebi b. es-Seyyid Ahmed, es-Seyyid Ali Çelebi b. İbrahim, el-Hâc Halil Çelebi b. İbrahim, Ahmed Çelebi b. İbrahim, es-Seyyid Mustafa b. Ali, es-Seyyid İbrahim b. Seyyid Mehmed, Seyyid Süleyman b. Seyyid Mehmed, Seyyid Mehmed b. İbrahim Efendi, Seyyid Hidâyetullah b. Seyyid Musa, Seyyid Ahmed b. Mustafa, Seyyid İbrahim b. Seyyid Ali.