Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 256 Hüküm no: 257 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soma kasabasından Ahmed’in Mehmed’de olan alacağını vârislerinden taleb etmesi Sulh. Vilâyet-i Anadolu’da Tarhala kazâsına tâbi‘ Soma kasabası ahâlîsinden el-Hâc Ahmed b. el-Hâc İbrahim Efendi nâm kimesne meclis-i şer‘-i şerîf-i enverde kasaba-i mezbûre ahâlîsinden iken bundan akdem vefât eden el-Hâc Mehmed b. İsmail b. Kābil nâm kimesnenin verâseti sulbî kebîr oğulları İsmail ve Mustafa ve Hüseyin ve sagīr oğlu Hasan ve sagīre kızı Emine’ye münhasıra olmağla işbu bâ‘isü’l-kitâb mezbûr İsmail mahzarında ikrâr ve takrîr-i kelâm edip müteveffâ-yı mezbûr el-Hâc Mehmed hayatında kazâ-i mezbûra tâbi‘ Kazanlı nâm karye tımarını yüz yirmi guruş bedel-i makbûz mukābelesinde bana der-uhde ve iltizâm ben dahi ba‘de’l-iltizâm tımar-ı mezbûru zabtetmeyip bedel-i mezbûr zimmetinde kaldığından mâ‘adâ birer guruş kıymetli elli re’s keçimi dahi bi-gayr-ı hakkın ahz u kabz ve beynimizde ma‘lûm tarla icâresinden elli guruş ve hâne icâresinden on guruş ki cem‘an iki yüz otuz guruş hakkım olmağla meblağ-ı mezbûru müteveffâ-yı mezbûr mâlından olmak üzere mezbûr İsmail’den taleb ve da‘vâ sadedinde iken ol dahi kazâ-i mezbûrede vâki‘ Bakırsuyu’nda dâir iki göz değirmenim ile ma‘lûmü’l-hudûd ve’l-kıt‘a tarlalarımı babam müteveffâ-yı mezbûrun ile’l-vefât taht-ı tasarrufunda olmağla ba‘de’l-vefât bize intikāl etmişidi deyü benden da‘vâ sadedinde olmağla beynimizde nizâ‘-ı küllî cereyân etmişidi. El-hâletü-hâzihi beynimize muslihûn tavassut etmekle mezbûr İsmail kendi mâlından teberrü‘an müdde‘âm olan iki yüz otuz guruşu bana def‘ ve teslîm ve zikri mürûr eden değirmen ve tarlalara müte‘allika âmme-i da‘vâdan benim zimmetimi ibrâ ve ıskāt eylediğinden ben dahi husûs-ı mezkûra ve müteveffâ-yı mezbûr ile hayatında beynimizde cereyân eden ahz u i‘tâya ve hukūk-ı ma‘lûme ve mechûleye müte‘allika âmme-i da‘vâdan mezbûr İsmail ile karındaşları gāibûn-ı mezbûrûnun zimmetlerini ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fî 25 min-Zilhicceti’ş-şerîfe sene [1]143. Şuhûdü’l-hâl: İbrahim Çelebi b. Musa, Ömer b. Süleyman, Salih b. Mustafa, Mehmed b. Hüseyin, Mehmed b. İvaz, Molla Abdünnebi b. Mehmed, Ahmed b. Mehmed, Bodur Ali b. Ahmed, Ali b. İbrahim, Kapıkethudâsı Mehmed Beşe b. Mustafa, Mustafa Beşe b. Mehmed kapı kethudâsı.