Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 258 Hüküm no: 259 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbn Meddas vakfından Mehmed b. Süleyman’ın tasarrufunda olan ve küçük çocuklarına intikal eden tamire muhtaç evin satılma izni Mahmiye-i İstanbul’da İbn-i Meddas mahallesi ahâlîsinden iken bundan akdem vefât eden Mehmed b. Süleyman’ın sulbî sagīr oğlu ile sagīre kızı Afîfe’nin min-kıbeli’l-üm cedleri ve vasîyy-i muhtârları olan Mustafa b. Mehmed nâm kimesne meclis-i şer‘-i şerîf-i enverde takrîr-i kelâm ve ta‘bîr ani’l-merâm edip mahalle-i mezbûrede vâki‘ İbn Meddas vakfından gallesi İbn Meddas müezzinine meşrûta olan tarafeynden Bâzergânbaşı vakfından el-Hâc Mustafa tasarrufunda olan menzil ve tarafeyni tarîk-ı âm ile mahdûd bir bâb fevkānî oda ve bir sofa ve bir bâb tahtânî oda ve sofa ve tahtında havluyu müştemil vakıf menzilin nısfı mezbûr Mehmed’in tasarrufunda olduğu hâlde vefât eyledikde evlâdları mezbûrân Ali ve Afîfe’ye intikāl-i âdî ile intikāl edip lâkin sagīrân-ı mezbûrânın zarûret-i nafakaları olduğundan mâ‘adâ menzil-i mezbûrun bazı mahalli ta‘mîr ve termîme muhtâc olup bedel-i misli ile âhara ferâğ mezbûrân haklarında enfa‘ olmağla bedel-i misliyle ferâğa kıbel-i şer‘den izin verilmek bi’l-vesâye matlûbumdur deyip ve hâl vech-i meşrûh üzere olup nısf-ı menzil-i mahdûd-ı mezbûr bedel-i misliyle âhara ferâğ sagīrân-ı mezbûrân haklarında min-külli’l-vücûh enfa‘ ve evlâ olduğunu zeyl-i kitâbda mektûbü’l-esâmî Müslimîn dahi haber vermeleriyle sagīrân-ı mezbûrânın menzil-i mahdûd-ı mezbûrda olan nısf hisselerin bedel-i misliyle âhara ferâğa vasîyy-i mezbûra kıbel-i şer‘den izin birle mâ-vaka‘a bi’t-taleb ketb olundu. Fî 26 Zilhicce sene [1]143. Şuhûdü’l-hâl: Hâfız Mehmed Efendi b. Hasan Efendi, Mehmed Efendi b. Mustafa el-mütevellî, Süleyman Efendi b. Mustafa el-hatîb, Hasan Efendi b. Himmet, es-Seyyid Mehmed Çelebi b. Mustafa, Mehmed Efendi imâm-ı Haydarpaşa, Salih Çelebi b. Süleyman. <>