Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 259 Hüküm no: 260 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmügülsüm Hatun’un küçük kızı için nafaka talebi Mahmiye-i İstanbul’da merhûm ve mağfûrün-leh Sultan Süleyman Han tâbe serâhu câmi‘-i şerîfi kurbünde Taşodaların birinde sâkine zâtı ta‘rîf-i şer‘î ile mu‘arrefe olan işbu sahibetü’l-kitâb Şerîfe Ümmügülsüm bt. el-Hâc Mehmed nâm hatun mahfil-i kazâda zevc-i sâbıkı Ahmed Bey b. Abdullah mahzarında takrîr-i kelâm ve ta‘bîr ani’l-merâm edip zevcim mezbûr Ahmed Bey’in firâşından hâsıla ve benden mütevellide bi-hakkı’l-hıdâne hacr ve terbiyemde olan sagīre kızım Şerîfe Zeyneb’in nafaka ve kisveye eşedd-i ihtiyâc olmağla kıbel-i şer‘den babası mezbûr Ahmed Bey üzerine kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb hazretleri târih-i kitâbdan beher yevm sagīre-i mezbûrenin nafaka ve kisvesiʼçün babası mezbûr üzerine bi’t-terâzî onar akçe farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisve vesâir levâzım-ı zarûriyesine harc ve sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Şerîfe Ümmügülsüm’e izin vermeğin mâ-vaka‘a bi’t-taleb ketb olundu. Fi’l-yevmi’s-sânî min-Muharremi’l-harâm li-sene erba‘a ve erba‘în ve mie ve elf. Şuhûdü’l-hâl: Çukadâr Abdullah b. Mehmed, Mehmed Çelebi b. Abdullah, Ahmed b. Mustafa, Abdullah b. Mustafa, Mustafa b. el-Hâc Mehmed, Mehmed Ağa b. Osman.