Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 260 Hüküm no: 262 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çıkrıkçı Hasan vakfının mütevellisi Ali ‘ye akar satın alma izni verildiği Mahmiye-i İstanbul’da Samatyakapısı dâhilinde el-Hâc Hüseyin mahallesinde vâki‘ merhûm Çıkrıkçı Hasan nâm sahibü’l-hayrın binâ eylediği mescid-i şerîf mühimmâtına mevkūfe akār ve nukūda yevmî bir akçe vazîfe ile bi’l-fi‘il mütevellî olan işbu bâ‘isü’l-kitâb el-Hâc Ali b. el-Hâc Mustafa nâm kimesne meclis-i şer‘-i şerîf-i enverde bi’t-tevliye takrîr-i kelâm ve bast-ı merâm edip vakf-ı mezbûr nukūdundan işbu yedimde olan iki bin guruş zâyi‘ ve telef olmamak için nukūd-ı mezkûre ile vakf-ı mezbûr için münâsib mahallerde akār iştirâ olunmak cânib-i vakf-ı mezbûra enfa‘ ve evlâ olmağın vâki‘ hâl mahalle-i mezbûre ahâlîsinden olup vakf-ı mezbûrun nâzırları olan işbu hâzırûn bi’l-meclis Müslimînden istihbâr olunup haberleri tahrîr ve mûcebince kıbel-i şer‘den bana izin verilmek bi’t-tevliye matlûbumdur dedikde gıbbe’l-istihbâr hakīkat-i hâl mütevellî-yi mezbûrun bâlâda takrîr ve beyân eylediği vech üzeredir deyü zeyl-i vesîkada muharrerü’l-esâmî Müslimînden her biri alâ-tarîkı’ş-şehâde ihbâr etmeğin ber-vech-i muharrer kıbel-i şer‘den mütevellî-yi mezbûra izin birle mâ-hüve’l-vâki‘ bi’t-taleb ketb olundu. Fî 26 min-Zilhicceti’ş-şerîfe sene [1]143. Şuhûdü’l-hâl: Mehmed Efendi b. Ahmed el-imâm, İsmail Çelebi b. Mustafa el-müezzin, Mustafa Yazıcı b. Hüseyin, Mustafa Çelebi b. el-Hâc Ali, İsmail Çelebi b. Hasan, Mehmed Çelebi b. Eyüb, Ali Beşe b. Mehmed, Mehmed Çelebi b. Abdullah, Du‘âcı İbrahim b. Mustafa.