Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 261 Hüküm no: 263 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kıbtî cizyesi taleb edilen Halil b. İvaz’ın Kıbtî olmadığını ispat etmesi Kıbtiyân tâifesi üzerlerine bâ-fermân-ı âlî edâsı lâzım gelen maktû‘ları cibâyetine meʼmûr olan Yusuf Bey b. Abdurrahman tarafından husûs-ı âti’z-zikre müseccel vekîlleri olan Çeribaşıları İbrahim b. Mehmed ve Usta Mehmed b. Ahmed nâm kimesneler meclis-i şer‘-i şerîf-i enverde Burgos kasabası mahallâtından Mumcuoğlu mahallesi ahâlîsinden bâ‘isü hâze’l-kitâb Halil b. İvaz mahzarında her biri bi’l-vekâle üzerlerine da‘vâ ve takrîr-i kelâm edip mezbûr Halil tâife-i mezbûreden olduğu ihbâr olunmağla bâ-fermân-ı âlî bir senelik üzerine edâsı lâzım gelen maktû‘unu taleb eylediğimiz[de] edâdan imtinâ‘ etmekle mezbûra suâl olunup edâya tenbîh olunması matlûbumuzdur dediklerinde gıbbe’s-suâl mezbûr Halil cevâbında ben tâife-i mezbûre maktû‘unu vermeyen kasaba-i mezbûrede sâkin Köle İvaz b. Abdullah nâm atîkin firâşından hâsıl ve zevcesi tâife-i mezbûre erbâbından olmayan Fâtıma bt. Abdullah nâm atîkadan mütevellid olup bu âna gelince kat‘a tâife-i mezbûre erbâbı gibi maktû‘ veregeldiğim yokdur deyü def‘ edicek müdde‘iyân-ı mezbûrândan ber-vech-i muharrer müdde‘âlarını musaddıka beyyine taleb olundukda ityân-ı beyyineden her biri izhâr-ı acz edicek fi’l-asl zikrolunan Mumcuoğlu mahallesi ahâlîsinden mahmiye-i İstanbul’da Samatyakapısı dâhilinde el-Hâc Hüseyin mahallesinde mutavattın İbrahim Beşe b. Veli ve Mehmed Sofu b. Ahmed ve Hüseyin Beşe b. İsa ve Mustafa Beşe b. İvaz nâm kimesneler li-ecli’l-ihbâr meclis-i şer‘a hâzırân olup gıbbe’l-istihbâr fi’l-hakīka mezbûr Halil Kıbtî tâifesinden olmayan Köle İvaz b. Abdullah’ın firâşından hâsıl ve zevcesi tâife-i merkūme erbâbından olmayan Fâtıma bt. Abdullah nâm câriyeden mütevellid olup bu âna gelince maktû‘ nâmıyla nesne veregeldiği kat‘a ma‘lûm ve mesmû‘umuz değildir deyü her biri alâ-tarîkı’ş-şehâde mezbûrân vekîller muvâcehesinde ihbâr etmeğin mezbûrân vekîller bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fî 28 min-Zilhicce sene [1]143. Şuhûdü’l-hâl: İbrahim Çelebi b. Mustafa du‘âcı, Kasım Mehmed b. Hüseyin, Hüseyin Çelebi b. Mustafa, Abdullah Çelebi b. Mustafa, Mehmed Çelebi b. İbrahim, es-Seyyid Ali b. Mustafa.