Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 262 Hüküm no: 264 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mariya bt. Panayot’un çocukları için nafaka talebi Nafaka. Mahmiye-i İstanbul’da Fenerkapısı <> dâhilinde Abdi Subaşı mahallesinde sâkine Mariya bt. Panayot nâm Nasrâniye zâtı ba‘de’t-ta‘rîfi’ş-şer‘ meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip zevcim gāib ani’l-meclis Kutnucu Mihal v. Lenberine nâm zimmî beni ve işbu sagīr oğulları Lenborine ve Hıristafi ve Yorgo ve sagīre kızı Despineye’yi bilâ-nafaka velâ-mün[fi]k-i şer‘î bırakıp diyâr-ı âhara gitmekle zevcim gāib-i mezbûr üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tahlîfi’ş-şer‘î hâkim-i muvakkı‘-ı sadr-ı kitâb tûbâ-leh ve hüsnü-meâb efendi hazretleri dahi mezbûre Mariya ile sagīrûn-ı mezbûrûnun nafaka ve kisveleriʼçün gāib-i mezbûr üzerine târih-i kitâbdan yevmî her birine ikişer para farz ve takdîr edip meblağ-ı mefrûz-ı mezbûru kendine ve sagīrûn-ı mezbûrûnun nafaka ve kisvelerine harc ve sarfa ve lede’l-iktizâ istidâneye ve inde’z-zafer zevci gāib-i mezbûr üzerine rücû‘a merkūme Mariya nâm Nasrâniyeye izin vermeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilhicceti’ş-şerîfe li-sene selâse ve erba‘în ve mie ve elf. Şuhûdü’l-hâl: İsmail b. Mehmed, İvaz b. Abdullah, Solak Mustafa b. Mehmed, el-Hâc Halil b. Mehmed, Mehmed b. İbrahim, İbrahim b. Mustafa, Mehmed Çelebi b. Abdullah.