Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 262 Hüküm no: 265 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin Galata’ya tâbi Sultanbayezid mahallesinde bulunan evinin üçte bir hissesini sattığı Mübâya‘a-i hisse. Mahmiye-i İstanbul’da Samatya kurbünde el-Hâc Hüseyin mahallesinde sâkin Haseki Mustafa Ağa b. Veliyüddin nâm kimesne meclis-i şer‘-i şerîf-i enverde bâ‘isü hâze’l-kitâb Cafer Ağa b. Ahmed b. Abdullah nâm kimesne tarafından husûs-ı âti’l-beyânda vekîl olduğu el-Hâc İbrahim b. Osman ve diğer İbrahim b. Mustafa nâm kimesneler şehâdetleriyle sâbit olan Ali Çelebi b. Mustafa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin rub‘u benim ve selâse erbâ‘ı Cafer Ağa veresesinin silk-i mülkünde münselik olup mahrûse-i Galata mahallâtından Sultan Bâyezid mahallesinde vâki‘ bir tarafdan Praşkova menzili ve bir tarafdan Zeyneb Hatun menzili ve bir tarafdan Varilci Yani menzili ve taraf-ı râbi‘i tarîk-ı âm ile mahdûd taş duvar ve bi’r-i mâ ve yetmiş beş zirâ‘ arsa üzerinde mebnî fevkānî bir bâb oda ve tahtânî bir bâb odada olan rub‘ hisse-i irsiyemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile müvekkil-i mezbûr Cafer Ağa’ya seksen guruşa bey‘ ve temlîk ve teslîm eylediğimde ol dahi iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr seksen guruşu müvekkil-i mezbûr Cafer Ağa yedinden tamamen ahz kabz eyledim. Ba‘de’l-yevm hisse-i mezkûrede kat‘a benim alâka ve medhalim kalmayıp mezbûr Cafer Ağa’nın mülk-i müşterâsı ve hakk-ı sırfı olmuşdur. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Zilhicce sene [1]143. Şuhûdü’l-hâl: Sultan Kethudâsı Ömer Ağa b. Ali, Kimyâcı Ahmed Ağa, Hüseyin Efendi dâmad-ı Mustafa Efendi, İbrahim Çelebi b. Mustafa, Mehmed Çelebi b. Abdullah.