Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 293 Hüküm no: 420 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hümâ Hatun’un işletmek üzere Yusuf Beşe’ye verdiği parayı ve nemasını bir sene sonra tamamen aldığı Mahmiye-i İstanbul’da Samanveren Mahallesi’nde sâkine olan Hümâ Hatun bt. Kara Mahmud tarafından husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında mezbûre karındaşı el-Hâc Mustafa Çelebi b. Mahmud ve zevci Ali Beşe b. Mehmed şehâdetleri ile şer‘an sâbite el-Hâc Hasan b. Hüseyin mahfil-i kazâda Keresteci tâifesinden işbu bâ‘isü’l-kitâb Yusuf Beşe b. Abdullah mahzarında bi’l-vekâle ikrâr ve takrîr-i kelâm edip müvekkile-i mezbûre merkūm Yusuf Beşe’ye târîh-i kitâbdan bir sene mukaddem mudârebe vechi üzere altmış bin nakd râyic fi’l-vakt fıddî akçe verip mezbûr Yusuf Beşe dahi meblağ-ı mezbûru alıp bir sene-i kâmil i‘mâl edip nemâsından dahi yirmi bin akçe hâsıl olup meblağ-ı mezbûr yirmi bin akçeden müvekkile-i mezbûreye on bin akçe isâbet etmekle meblağ-ı mezbûr on bin akçenin bedeli ve re’s-i mâlı olan altmış bin akçeyi ki cem‘an yetmiş bin akçe olur bi’t-tamam ve’l-kemâl mezbûr Yusuf Beşe yedinden ahz u kabz edip meblağ-ı mezbûrun aslına ve nemâsına müte‘allik da‘vâdan mezbûr Yusuf Beşe’nin zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledi, müvekkile-i mezbûrenin merkūm Yusuf Beşe ile husûs-ı mezbûra müte‘allik min-ba‘d da‘vâsı kalmadı dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sânî min-Ramazani’l-mübârek sene 1064. Şuhûdü’l-hâl: Halil Çelebi b. Hüseyin, Ali Beşe b. Mustafa, el-Hâc Abdi b. Receb, Ahmed Çelebi [b.] Mahmud, Hüseyin Çelebi b. Hasan, Şeyh Mehmed Efendi b. Yunus, Mustafa Kethüdâ, İbrahim Çelebi, Pîrî Beşe b. Hüseyin ve gayruhum.